تل ابیب(اے بی این نیوز )سویڈن میں قرآن مجید کی بے حرمتی کیخلاف دنیا بھر میں غم وغصہ پایا جاتا ہے ۔جہاں مسلمانوں میں مقدس کتاب کی بے حرمتی پر سیخ پا ہیں وہاں غیر مسلم بھی میدان میں آگئے ۔ ذرائع کے مطابق اسرائیلی صدر اسحاق ہرزیوگ نے سویڈن میں قرآن پاک کی بے حرمتی کی شدید الفاظ میں مذمت کرتے ہوئے کہا ہے کہ مقدس کتاب کی بے حرمتی پر خاموش نہیں رہ سکتے۔ اسرائیلی صدر اسحاق ہرزیوگ نے قرآن پاک کی بے حرمتی کو ذلت آمیز فعل قرار دیتے ہوئے کہا کہ کسی بھی مذہب کی مقدس کتب کو جلاناانتہائی سنگین جرم ہے۔اسرائیلی صدر اسحاق ہرزیوگ نے عالمی برادری سے مطالبہ کیا ہے کہ مذہبی رواداری، نفرت اور پُر تشدد واقعات کی روک تھام کے لیے فوری توجہ اور مشترکہ کوششیں کرے۔یاد رہے کہ سویڈن میں انتہا پسند رہنما نے عیدالاضحیٰ کے روز مرکزی مسجد کے باہر احتجاجی مظاہرہ کیا جس میں قرآن پاک کے مقدس اوراق کو جلانے کی ناپاک جسارت کی گئی تھی۔
