کراچی (اے بی این نیوز) ایئربس کے تیار کردہ دنیا کے مشہور اے 320 طیاروں میں سافٹ ویئر کی خرابی نے دنیا بھر میں تشویش پیدا کر دی ہے اور ہزاروں طیاروں کو فوری طور پر گراؤنڈ کرنا پڑا ہے۔
پاکستان انٹرنیشنل ایئرلائنز (پی آئی اے) کے ترجمان نے اپنے بیان میں یقین دلایا ہے کہ قومی ایئرلائن کی ملکیت ایئربس طیاروں کو کوئی خطرہ نہیں ہے، کیونکہ وہ اب بھی سافٹ ویئر کے پرانے ورژن پر چل رہے ہیں۔
ترجمان کا کہنا تھا کہ ایئربس نے ایک نیا سافٹ ویئر پیچ جاری کیا ہے جس میں مسئلہ پیدا ہوا ہے، اس کا نمبر 104 ہے اور ایئربس نے تمام ایئرلائنز کو پرانا ورژن دوبارہ لوڈ کرنے کی ہدایت کی ہے، تاہم ہمارے کسی طیارے میں یہ ورژن لوڈ نہیں ہے، اس لیے ہمارے تمام طیارے محفوظ ہیں۔
ترجمان نے بتایا کہ قومی ایئرلائن کے بیڑے میں ایئربس اے 320 طیاروں کی تعداد 17 ہے۔
واضح رہے کہ فرانسیسی طیارہ ساز کمپنی ایئربس نے فوری طور پر اے 320 طیاروں کا سافٹ ویئر تبدیل کرنے کا فیصلہ کیا ہے، کمپنی کے اس اقدام سے دنیا بھر میں 6 ہزار طیارے متاثر ہوسکتے ہیں۔ امریکن ایئر لائنز، ڈیلٹا ایئرلائنز، ایئر نیوزی لینڈ سمیت کئی کمپنیوں نے پروازوں میں خلل کی وارننگ جاری کی ہے۔
30 اکتوبر کو جیٹ بلیو طیارہ پرواز کے دوران کنٹرول کھو بیٹھا اور اچانک اونچائی سے نیچے گرا، جس سے یہ بات سامنے آئی کہ شمسی تابکاری ڈیٹا کو نقصان پہنچا سکتی ہے اور کنٹرول کو متاثر کر سکتی ہے۔
مزید پڑھیں:ڈکی بھائی کی رہائی کے بعد نیا موڑ! مشکل نے سب کو چونکا دیا
