واشنگٹن (نیوز ڈیسک )سابق امریکی صدر جمی کارٹر 100 برس کی عمر میں انتقال کر گئے، امریکی صدر جوبائیڈن نے سابق صدرجمی کارٹر کی سرکاری اعزاز کے ساتھ تدفین کا اعلان کیا ہے۔
سابق امریکی صدر جمی کارٹر اتوار کی دوپہر جارجیا میں اپنے گھر پر انتقال کرگئے، ان کی عمر 100 برس تھی۔ جمی کارٹر پہلے امریکی صدر تھے جنہوں نے 100 سالہ زندگی پائی۔ غیر ملکی میڈیا رپورٹس کے مطابق امریکی صدر جوبائیڈن نے جمی کارٹر کی سرکاری اعزاز کے ساتھ تدفین کا اعلان کیا ہے۔ امریکی صدر جو بائیڈن نے اپنے بیان میں کہاہے کہ امریکا اور دنیا نے ایک غیر معمولی رہنما ، سیاستدان اور انسان دوست کو کھو دیا۔
جو بائیڈن کا کہنا تھا کہ جمی کارٹر کی شخصیت اصول، ایمان اور انسان دوستی کی علامت تھی، جوشخص مقصد اور بامعنی زندگی گزارنے کا مطلب جاننا چاہتے ہے وہ جمی کارٹر کا مطالعہ کرے۔ واضح رہے کہ جمی کارٹرامریکا کے39 ویں صدر تھے۔ ان کا تعلق ڈیموکریٹک پارٹی سے تھا۔انہوں نے 1977 سے 1981 تک امریکا کے صدر کے طور پر ذمہ داریاں نبھائیں۔
دوسری جانب سابق امریکی صدر بل کلنٹن اور ان کی اہلیہ سابق وزیر خارجہ ہلیری کلنٹن،سابق امریکی صدر باراک اوباما،سابق صدر جارج بش نے جمی کارٹر کے انتقال پر گہرے دکھ کا اظہار کیا ہے ۔
مزید پڑھیں: نوشہروفیروز میں ٹرالر اور وین میں خوفناک ٹکر،7 افراد جاں بحق
