تل ابیب(نیوزڈیسک) اسرائیلی فوجی ڈاکٹرز اور پیرا میڈیکل سٹاف کے روپ میں ابن سینا ہسپتال میں داخل ہوگئے ، حملے میں 3 فلسطینی نوجوانوں کو گولیاں مار کر شہید کردیا۔عالمی خبر رساں ادارے کے مطابق شہید فلسطینی نوجوانوں کی شناخت محمد، باسل الغزاوی اور محمد جلامنہ کے ناموں سے ہوئی جن کی عمریں 20 سے 25 سال کے درمیان ہیں۔سوشل میڈیا پر وائرل ویڈیوز میں دیکھا جا سکتا ہے کہ ہسپتال کے فلور پر ڈاکٹرز اور نرسز کے بھیس میں چند افراد داخل ہوتے ہیں اور کوٹ اتار کر اسلحہ نکال لیتے ہیں۔یہ مسلح افراد ایک کمرے میں داخل ہوکر بستر پر لیٹے دو فلسطینی نوجوانوں پر گولیاں برسا دیتے ہیں جبکہ ایک اور فلسطینی نوجوان کو پکڑ کر فرش پر بٹھا دیتے ہیں اور اسے بھی قتل کردیتے ہیں۔اسرائیلی فوج نے تصدیق کی کہ ہسپتال میں بھیس بدل کر داخل ہونے والے مسلح افراد ان کے اسپیشل سیکیورٹی فورسز کے کمانڈوز تھے جو اسرائیل پر حملوں کے ذمہ دار افراد کو ’’سزا‘‘ دینے آئے تھے۔
