اسلام آباد(اے بی این نیوز) سوئیڈن میں مسجد کے باہر قرآن پاک کی بے حرمتی کا واقعہ،ترجمان دفتر خارجہ کی طرف سے قرآن پاک کی بے حرمتی کی شدید مذمت،آزادی اظہار اور احتجاج کے بہانے تشدد پر اکسانے کو جائز قرار نہیں دیا جا سکتا، ترجمان دفتر خارجہ نے اپنے مذمتی بیان میں کہا کہ مذہبی منافرت کی کسی بھی وکالت پر پابندی عائد کی جائے،مغرب میں اسلامو فوبیا کے واقعات کا اعادہ قانونی فریم ورک پر سنگین سوال اٹھاتا ہے۔واقعے پر پاکستان کے تحفظات سویڈن تک پہنچائے جا رہے ہیں، ترجمان دفتر خارجہ کا کہنا تھا کہ عالمی برادری اسلامو فوبیا اور مسلم مخالف جذبات کیخلاف ٹھوس اقدامات کرے،آزادی اظہار اور احتجاج کے بہانے امتیازی سلوک، نفرت اور تشدد کے لیے اس طرح کی جان بوجھ کر اکسانے کو جائز قرار نہیں دیا جا سکتا۔بین الاقوامی قانون کے تحت، ریاستوں کا فرض ہے کہ وہ مذہبی منافرت کی کسی بھی وکالت پر پابندی عائد کریں، جو تشدد کو بھڑکانے کا باعث بنے۔مغرب میں پچھلے چند مہینوں کے دوران اس طرح کے اسلام فوبک واقعات کا اعادہ اس قانونی فریم ورک پر سنگین سوال اٹھاتا ہے جو نفرت پر مبنی کارروائیوں کی اجازت دیتا ہے۔ہم اس بات کا اعادہ کرتے ہیں کہ آزادی اظہار اور رائے کا حق نفرت کو ہوا دینے اور بین المذاہب ہم آہنگی کو سبوتاژ کرنے کا لائسنس فراہم نہیں کرتا۔قرآن پاک کی بے حرمتی جیسے مکروہ واقعے پر پاکستان کے تحفظات سویڈن تک پہنچائے جا رہے ہیں۔ہم ایک بار پھر زور دیتے ہیں کہ بین الاقوامی برادری اور قومی حکومتوں دونوں پر لازم ہے کہ وہ زینو فوبیا، اسلامو فوبیا اور مسلم دشمنی کے بڑھتے ہوئے واقعات کو روکنے کے لیے قابل اعتماد اور ٹھوس اقدامات کریں۔
