اسلام آباد: شہریوں کے لیے پاسپورٹ وصول کرنے کے عمل کو مزید آسان بنانے کے لیے ملک بھر میں پاسپورٹ ڈیلیوری کاؤنٹرز ہفتہ کے روز بھی کھلے رکھنے کا فیصلہ کیا گیا ہے۔
ڈی جی امیگریشن اینڈ پاسپورٹس کے مطابق ہفتہ وار خصوصی سہولت کے تحت پاسپورٹ ڈیلیوری کاؤنٹرز ہر ہفتہ صبح 8 بجے سے شام 4 بجے تک شہریوں کو خدمات فراہم کریں گے۔
حکام کے مطابق یہ اضافی سہولت دو ماہ تک جاری رہے گی، جس کے دوران شہری ہفتہ کے روز بھی اپنے تیار شدہ پاسپورٹس متعلقہ کاؤنٹرز سے وصول کرسکیں گے۔
ڈی جی امیگریشن اینڈ پاسپورٹس نے ایسے شہریوں کو خصوصی طور پر اس سہولت سے فائدہ اٹھانے کا مشورہ دیا ہے جو معمول کے دفتری اوقات میں پاسپورٹ وصول کرنے کے لیے دفتر نہیں آسکتے۔ ہفتہ کو کاؤنٹرز کھلے رکھنے سے ملازمت یا دیگر مصروفیات کے باعث عام دنوں میں آنے سے قاصر افراد کو آسانی ہوگی۔
حکام نے شہریوں کو ہدایت کی ہے کہ تیار ہونے والے پاسپورٹس مقررہ وقت پر وصول کرلیں۔ ڈی جی امیگریشن اینڈ پاسپورٹس کے مطابق جو پاسپورٹس چھ ماہ سے زائد عرصے تک وصول نہیں کیے جائیں گے، انہیں حکومتی پالیسی کے تحت تلف کردیا جائے گا۔
شہریوں سے اپیل کی گئی ہے کہ وہ اپنے پاسپورٹس کی تیاری کے بعد انہیں بلاوجہ زیر التوا نہ رکھیں اور بروقت وصولی کو یقینی بنائیں۔
نئی سہولت کے تحت ہفتہ وار اضافی اوقات میں پاسپورٹ ڈیلیوری کاؤنٹرز سے پاسپورٹس کی وصولی شہریوں کے لیے ایک اضافی سہولت ہوگی، خاص طور پر ان افراد کے لیے جو ہفتے کے دیگر دن سرکاری دفاتر نہیں جا پاتے۔
