اسلام آباد: وزیراعظم شہباز شریف نے سیلاب متاثرین کیلئے امدادی سرگرمیاں مزید مؤثر بنانے اور متاثرہ علاقوں میں تمام دستیاب وسائل بروئے کار لانے کی ہدایت کردی ہے۔ وزیراعظم سے چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک نے ملاقات کی، جس میں ملک میں سیلاب کی صورتحال اور متاثرہ افراد کے لیے جاری امدادی اقدامات کا جائزہ لیا گیا۔
ملاقات کے دوران چیئرمین این ڈی ایم اے نے وزیراعظم کو موجودہ موسمی صورتحال، سیلاب سے متاثرہ علاقوں اور وہاں جاری ریسکیو و ریلیف سرگرمیوں کے بارے میں بریفنگ دی۔ وزیراعظم نے ہدایت کی کہ متاثرین کو فوری اور مؤثر امداد کی فراہمی میں کسی قسم کی رکاوٹ نہیں ہونی چاہیے۔
وزیراعظم شہباز شریف نے این ڈی ایم اے کو صوبائی متعلقہ اداروں اور صوبائی ڈیزاسٹر مینجمنٹ اتھارٹیز (پی ڈی ایم ایز) کے ساتھ مؤثر رابطہ برقرار رکھنے کی ہدایت بھی کی۔ ان کا کہنا تھا کہ مشکل کی اس گھڑی میں تمام اداروں کے درمیان مربوط تعاون ضروری ہے تاکہ متاثرہ علاقوں میں امدادی کارروائیاں تیزی سے جاری رکھی جاسکیں۔
ملاقات میں نیشنل ایمرجنسیز آپریشن سینٹر کے امور پر بھی بات ہوئی۔ وزیراعظم نے سیلاب اور دیگر ہنگامی صورتحال کی نگرانی اور انتظام کے لیے مصنوعی ذہانت (اے آئی) سمیت جدید ٹیکنالوجی کے استعمال کو سراہا۔
چیئرمین این ڈی ایم اے کے مطابق خیبرپختونخوا، گلگت بلتستان اور آزاد کشمیر میں متاثرہ افراد کے لیے امدادی کارروائیاں جاری رہیں گی۔ متعلقہ ادارے صورتحال پر نظر رکھے ہوئے ہیں اور ضرورت کے مطابق امدادی سرگرمیوں کو آگے بڑھایا جائے گا۔
حالیہ صورتحال کے پیش نظر وفاقی اور صوبائی اداروں کے درمیان رابطہ، بروقت امداد اور متاثرہ علاقوں تک ضروری سامان کی رسائی کو اہم قرار دیا جا رہا ہے۔ حکومت کی جانب سے تمام دستیاب وسائل استعمال کرنے کی ہدایت بھی اسی سلسلے کی کڑی ہے۔
