کراچی (اے بی این نیوز) انٹرمیڈیٹ بارہویں جماعت آرٹس ریگولر گروپ کے سالانہ امتحانات برائے 2026ء کے نتائج کا اعلان کردیا گیا۔

تفصیلات کے مطابق اعلیٰ ثانوی تعلیمی بورڈ کراچی نے انٹرمیڈیٹ بارہویں جماعت آرٹس ریگولر گروپ کے سالانہ امتحانات برائے 2026ء کے نتائج کا اعلان کردیا ہے

چیئرمین انٹربورڈ کراچی فقیر محمد لاکھو نے نتائج کا اعلان کرتے ہوئے کہا کہ آرٹس ریگولر گروپ کے امتحانات میں اقراء حفاظ گرلز سائنس کالج بلاک بی نارتھ ناظم آباد کی طالبہ انشرا بنت محمد توفیق رول نمبر 58093 نے ٹوٹل 1100میں سے 926 نمبرز اے ون گریڈ کے ساتھ پہلی پوزیشن حاصل کی۔

دوسری پوزیشن گورنمنٹ ڈگری کالج کونکر ولیج گڈاپ کے طالب علم عاقب رزاق ولد عبدالرزاق رول نمبر 43415 نے 919نمبرز اے ون گریڈ کے ساتھ جبکہ تیسری پوزیشن اقراء حفاظ گرلز سائنس کالج بلاک بی نارتھ ناظم آباد کی طالبہ حمیرا بنت محمد شاکر لاکھانی رول نمبر 58097 نے 918 نمبرز اے ون گریڈ کے ساتھ حاصل کی۔

چیئرمین فقیر محمد لاکھو کا کہنا تھا کہ گورنمنٹ ڈگری کالج کونکر ولیج گڈاپ کے طالبعلم کا دوسری پوزیشن حاصل کرنا طالبعلم، اساتذہ اور پرنسپل کی محنت، لگن اور بہترین رہنمائی کا نتیجہ ہے۔

انہوں نے کہا کہ انٹرمیڈیٹ کے نتائج میں سرکاری تعلیمی اداروں کے طلبہ کا نمایاں کامیابیاں حاصل کرنا اس بات کا ثبوت ہے کہ سندھ میں تعلیمی معیار مسلسل بہتر ہورہا ہے۔

ناظم امتحانات زرینہ راشد نے نتائج کی تفصیلات بتاتے ہوئے کہا کہ آرٹس ریگولر گروپ کے امتحانات میں 10 ہزار 459 امیدواروں نے رجسٹریشن حاصل کی، 10 ہزار 2 امیدوارا متحانات میں شریک ہوئے، جس میں سے 4526امیدوار کامیاب قرار پائے اس طرح کامیابی کا تناسب 45.25 فیصد رہا۔

ان امتحانات میں 20 امیدوار اے ون گریڈ، 274 اے گریڈ، 762 بی گریڈ، 1647 سی گریڈ، 1659 ڈی گریڈ اور 164ای گریڈ میں کامیاب قرار پائے جبکہ 2امیدوار پاس ہوئے۔

نتائج بورڈ کی ویب سائٹ www.biek.edu.pk پر اپ لوڈ کردیئے گئے ہیں، امیدوا ر اپنے نتائج اعلیٰ ثانوی تعلیمی بورڈ کراچی کی آفیشل اینڈرائڈ ایپ پر بھی دیکھ سکتے ہیں۔ اینڈرائڈ ایپ کو گوگل پلے اسٹور پر BIEK کے نام سے سرچ کر کے موبائل میں انسٹال کیا جاسکتا ہے۔
مزید پڑھیں: ایران اور عمان کے درمیان آبنائے ہرمز معاہدہ جلد ہوگا،امریکی عہدیدار کا دعویٰ