ٹی ٹی ایس اساتذہ کی تنخواہوں میں اضافہ کی منظوری وفاقی حکومت نے دے دی ہے، جس کے تحت ملک کی جامعات میں ٹینیور ٹریک سسٹم (TTS) کے تحت خدمات انجام دینے والے اساتذہ کی تنخواہوں میں 35 فیصد اضافہ کیا جائے گا۔ نئے پے پیکیج کا اطلاق یکم جولائی 2026ء سے ہوگا۔

وزارتِ خزانہ کی جانب سے جاری آفس میمورنڈم کے مطابق وفاقی کابینہ نے وزیر اعظم کے سابقہ فیصلے کی توثیق کرتے ہوئے ٹی ٹی ایس پے پیکیج 2026ء کی منظوری دی ہے۔ اس فیصلے کے تحت پروفیسر، ایسوسی ایٹ پروفیسر اور اسسٹنٹ پروفیسر کے تنخواہی اسکیلز پر نظرثانی کی گئی ہے۔

پروفیسرز کے لیے نئے تنخواہی اسکیل

نظرثانی شدہ پے اسکیل کے مطابق ٹی ٹی ایس پروفیسر کی کم از کم تنخواہ 3 لاکھ 94 ہزار 875 روپے سے بڑھا کر 4 لاکھ 7 ہزار 230 روپے کر دی گئی ہے۔ اسی طرح سالانہ اضافہ بھی بڑھا دیا گیا ہے، جبکہ زیادہ سے زیادہ تنخواہ 7 لاکھ 12 ہزار 30 روپے مقرر کی گئی ہے۔

ایسوسی ایٹ پروفیسر اور اسسٹنٹ پروفیسر کو بھی ریلیف

ایسوسی ایٹ پروفیسر کی کم از کم تنخواہ بڑھا کر 3 لاکھ 70 ہزار 810 روپے کر دی گئی ہے، جبکہ زیادہ سے زیادہ تنخواہ 6 لاکھ 45 ہزار 610 روپے مقرر کی گئی ہے۔

اسی طرح اسسٹنٹ پروفیسر کی کم از کم تنخواہ 2 لاکھ 88 ہزار 20 روپے اور زیادہ سے زیادہ تنخواہ 5 لاکھ 53 ہزار 820 روپے مقرر کی گئی ہے۔ سالانہ انکریمنٹ میں بھی اضافہ کیا گیا ہے۔

اطلاق اور مالی ذمہ داری

وزارتِ خزانہ کے مطابق 30 جون 2026ء تک ملازمت میں موجود تمام ٹی ٹی ایس اساتذہ کی بنیادی تنخواہ نئے ٹی ٹی ایس-2026 اسکیل میں اسی مرحلے (اسٹیج) پر منتقل کی جائے گی، جس پر وہ پہلے سے موجود ہیں۔

آفس میمورنڈم میں واضح کیا گیا ہے کہ تنخواہوں میں اضافے سے پیدا ہونے والے مالی اخراجات متعلقہ جامعات اپنے وسائل سے پورے کریں گی اور اس مقصد کے لیے وفاقی حکومت اضافی فنڈز فراہم نہیں کرے گی۔

تعلیمی حلقوں نے اس فیصلے کو جامعات میں تدریسی شعبے کے لیے مثبت پیش رفت قرار دیتے ہوئے امید ظاہر کی ہے کہ اس سے اعلیٰ تعلیم کے شعبے میں مزید بہتری آئے گی۔