کراچی میں بارش کی پیشگوئی نے شدید گرمی اور حبس سے پریشان شہریوں کے چہروں پر خوشی بکھیر دی ہے۔ محکمہ موسمیات کے مطابق شہر قائد میں آئندہ تین روز کے دوران موسم کا مزاج تبدیل ہونے کا امکان ہے جبکہ مختلف علاقوں میں ہلکی بارش اور بوندا باندی بھی متوقع ہے۔
محکمہ موسمیات کی تازہ رپورٹ کے مطابق اگلے چند دنوں میں کراچی کا مطلع جزوی طور پر ابر آلود رہ سکتا ہے۔ موسم گرم اور مرطوب رہے گا، تاہم سمندری ہواؤں کی رفتار میں اضافے کے باعث گرمی کی شدت میں کمی آنے کا امکان ظاہر کیا گیا ہے۔
ماہرین موسمیات کا کہنا ہے کہ رات اور صبح کے اوقات میں شہر کے مختلف علاقوں میں ہلکی بارش یا بوندا باندی ہو سکتی ہے۔ اس موسمی تبدیلی سے درجہ حرارت میں کچھ کمی اور موسم میں خوشگوار احساس پیدا ہونے کی توقع کی جا رہی ہے۔
کراچی میں بارش کی پیشگوئی کے تحت آئندہ تین روز کے دوران زیادہ سے زیادہ درجہ حرارت 34 سے 36 ڈگری سینٹی گریڈ کے درمیان رہنے کا امکان ہے۔ اس دوران تیز سمندری ہوائیں بھی چل سکتی ہیں جو شہریوں کو گرمی سے کچھ حد تک نجات دلانے میں مددگار ثابت ہوں گی۔
دوسری جانب سندھ کے ساحلی علاقوں میں بھی جزوی ابر آلود موسم کی توقع کی جا رہی ہے۔ بعض مقامات پر تیز ہواؤں کے ساتھ ہلکی بوندا باندی کا امکان موجود ہے، جس سے موسم مزید خوشگوار ہو سکتا ہے۔
محکمہ موسمیات کے مطابق سندھ کے بیشتر اضلاع میں موسم گرم اور خشک رہے گا، تاہم لاڑکانہ، دادو، جیکب آباد اور قمبر شہدادکوٹ کے چند علاقوں میں گرد آلود ہواؤں اور ہلکی بارش کے امکانات موجود ہیں۔ ماہرین کا کہنا ہے کہ یہ موسمی تبدیلی عارضی طور پر شدید گرمی سے ریلیف فراہم کر سکتی ہے۔
