اسلام آباد(اے بی این نیوز) پاکستان کے ساتھ برادرانہ اور خصوصی تعلقات کے ایک اہم اظہار میں سعودی ولی عہد شہزادہ محمد بن سلمان نے پاکستان کو 3 بلین ڈالر بطور ڈیپازٹ کی خاطر خواہ مالی امداد فراہم کرنے کا پیغام دیا ہے جو پاکستان کے معاشی استحکام کے لیے سعودی عرب کے مسلسل عزم کو ظاہر کرتا ہے۔
باخبر ذرائع کے مطابق ولی عہد نے چند روز قبل سعودی عرب کے وزیر خزانہ کو خصوصی مختصر دورے پر پاکستان بھیجا تھا تاکہ وہ ولی عہد کی جانب سے پاکستانی قیادت کو یقین دلائیں کہ پاکستان کو خلیجی ملک کی جانب سے تقریباً 3 ارب ڈالر کی واپسی کے نتیجے میں پیدا ہونے والے زرمبادلہ کے ممکنہ خلا سے پریشان ہونے کی ضرورت نہیں ہے۔
ایک سینئر حکومتی ذریعے نے بتایا کہ اس دورے کا واحد مقصد پاکستانی قیادت کو یہ یقین دلانا تھا کہ سعودی عرب پاکستان کے زرمبادلہ کے ذخائر میں پیدا ہونے والے خلا کو پر کرنے کے لیے آگے بڑھے گا۔
یہ پیشرفت ایک ایسے وقت میں ہوئی ہے جب ایک دوست خلیجی ملک پاکستان کے ذخائر سے 3 ارب ڈالر سے زائد نکال رہا ہے جس کے جواب میں سعودی عرب نے اسٹیٹ بینک آف پاکستان میں اتنی ہی رقم جمع کرانے کا وعدہ کیا ہے تاکہ اس بات کو یقینی بنایا جا سکے کہ ملکی ذخائر مستحکم رہیں۔
حکام نے اس اقدام کو سعودی قیادت کا ایک “غیر معمولی قدم” قرار دیا، جو دونوں ممالک کے درمیان اسٹریٹجک اعتماد اور مضبوط دوطرفہ تعلقات کی عکاسی کرتا ہے۔یہ بات قابل غور ہے کہ اسٹیٹ بینک آف پاکستان کے پاس پہلے ہی 5 ارب ڈالر سعودی ڈپازٹس ہیں۔
ذرائع کے مطابق پاکستانی قیادت چاہے وہ سویلین ہو یا فوجی، سعودی ولی عہد کے اس خصوصی اور ذاتی اشارے پر بے حد مشکور ہے۔
مزید پڑھیں:ایران امریکا مذاکرات پھر سے !پاکستان نے بڑی پیشکش کردی ، جانیے کیا؟
