لاہور (اوصاف نیوز) ڈرائیونگ لائسنس کے اجراء کے لیے عمر کی حد 18 سے کم کرکے 16 سال کرنے کی قرارداد پنجاب اسمبلی میں جمع کرادی گئی۔
تفصیلات کے مطابق پنجاب اسمبلی میں اپوزیشن رکن شیخ امتیاز محمود نے قرارداد جمع کرائی، جس میں کہا گیا ہے کہ پاکستان خصوصاً پنجاب میں نوجوانوں کی شرح میں تیزی سے اضافہ اس قدر ہوا ہے کہ انہیں معیشت میں شامل کرنے کے لیے ڈرائیونگ کی عمر 18 سے کم کرکے 16 سال کی جائے۔
قرارداد کے متن میں کہا گیا ہے کہ کینیڈا کے بیشتر صوبوں میں ڈرائیونگ کی اجازت 16 سال کی عمر میں دی جاتی ہے جب کہ جرمنی میں 17 سال کی عمر میں ڈرائیونگ لائسنس دیے جاتے ہیں۔
قرارداد میں مطالبہ کیا گیا ہے کہ پاکستان میں بھی نوجوانوں کو ملکی ترقی کے دھارے میں لانے کے لیے ڈرائیونگ کی عمر 18 سے کم کرکے 16 سال کی جائے۔
مزید پڑھیں:پنجاب بار کونسل کا رزلٹ آگیا، کس گروپ نے میدان مارا؟
