راولپنڈی( نیوز ڈیسک )اڈیالہ جیل میں پاکستان تحریک انصاف (پی ٹی آئی) کے بانی عمران خان کی مبینہ طور پر سہولت کاری کے الزام میں زیر حراست سابق ڈپٹی سپرنٹنڈنٹ ظفر اقبال کو رہا کر دیا گیا۔
ذرائع کے مطابق 13 اگست کو ڈپٹی سپرنٹنڈنٹ ظفر اقبال کو تفتیش کے لیے تحویل میں لیا گیا تھا اور وہ گزشتہ رات اڈیالہ جیل کے قریب واقع اپنی رہائش گاہ پہنچ گئے ہیں۔
جیل میں عمران خان کی مبینہ سہولت کاری کے شبے میں اڈیالہ جیل کے مزید دو افسران سے بھی پوچھ گچھ کی گئی جن میں سابق ڈپٹی سپرنٹنڈنٹ ظفر اقبال اور اسسٹنٹ ناظم بھی شامل ہیں جب کہ دونوں افسران سابق ڈی ایس پی اکرم کی رہائش گاہ کے قریب رہائش پذیر تھے۔
اس سے قبل 14 اگست کو ڈپٹی سپرنٹنڈنٹ اڈیالہ جیل محمد اکرم کو پی ٹی آئی کے بانی کو پیغام رسانی اور سہولت کاری کے الزام میں حراست میں لیا گیا تھا۔ وہ 15 سال سے زائد اڈیالہ جیل میں تعینات رہے۔محمد اکرم کی بازیابی کے لیے اہلیہ نے لاہور ہائی کورٹ میں درخواست دے دی، جس میں کہا گیا کہ 14 اگست سے اکرم کے بارے میں کچھ معلوم نہیں۔
تھانہ صدر کو درخواست دی لیکن مقدمہ درج نہیں ہوا۔عدالت نے پولیس کو 20 اگست کے لیے نوٹس جاری کرتے ہوئے جواب طلب کر لیا۔
مزید پڑھیں: پشاور ،روٹی کی قیمت میں پانچ روپے کا اضافہ ،نوٹیفکیشن جاری
