سلام آباد (اے بی این نیوز) مسابقتی اپیل ٹریبونل (سی اے ٹی) نے 27 مئی 2025 کو کنگڈم ویلی (پرائیویٹ) لمیٹڈ کے خلاف مسابقتی کمیشن آف پاکستان (سی سی پی) کے حکم کو برقرار رکھتے ہوئے کمپنی کو 35 ملین روپے جرمانہ جمع کرانے کی ہدایت کر دی۔
سی سی پی نے کارروائی میں پایا کہ کنگڈم ویلی نے جان بوجھ کر دھوکہ دہی پر مبنی مارکیٹنگ کی۔ کمپنی نے اپنے پراجیکٹ کو بل بورڈز، سوشل میڈیا اور اشتہارات کے ذریعے “کنگڈم ویلی اسلام آباد” کے نام سے مشتہر کیا، جبکہ وہ دراصل موضع چورا، راولپنڈی میں واقع ہے۔ اس طرح صارفین کو زیادہ قیمت پر پلاٹ بیچنے کے لیے گمراہ کیا گیا۔
مزید یہ کہ پراجیکٹ کو “این او سی منظور شدہ” قرار دے کر بڑے پیمانے پر تشہیر کی گئی، حالانکہ باضابطہ منظوری سے پہلے ہی اشتہاری مہم شروع کر دی گئی تھی۔ ٹریبونل نے اسے “دھوکہ دینے کی حسابی حکمت عملی” قرار دیا۔تفصیلی فیصلے میں ٹریبونل نے کہا کہ کمپنی نے مقام کی “واضح غلط بیانی” کی، جو ایک “گہری ڈیفالٹ” ہے۔
کنگڈم ویلی کا یہ دفاع مسترد کر دیا گیا کہ رئیل اسٹیٹ سیکٹر میں ایسے طریقے عام ہیں۔ ٹریبونل نے ریمارکس دیے: “جب دن کی روشنی میں خلاف ورزی ہو تو دھوکہ دہی کا زاویہ ناقابل تسخیر ہو جاتا ہے” اور “دو غلطیاں کبھی ایک کو درست نہیں کرتیں”۔ایکٹ کے سیکشن 10(2)(b) کے تحت خلاف ورزی ثابت ہونے پر 35 ملین کا جرمانہ برقرار رکھا گیا۔
ٹریبونل نے واضح کیا کہ 20 دن میں جرمانہ جمع نہ ہوا تو CCP کا اصل حکم مکمل بحال ہو جائے گا، جس سے کمپنی پر مالی بوجھ بڑھ جائے گا۔ٹریبونل نے زور دیا کہ رئیل اسٹیٹ میں ایسے گمراہ کن دعوے صارفین کو شدید مالی نقصان پہنچاتے ہیں۔ یہ فیصلہ دھوکہ دہی پر مبنی مارکیٹنگ کے خلاف CCP کے سخت موقف کی توثیق کرتا ہے۔
مزید پڑھیں: آپریشن غضب للحق،پاک فوج کی بڑی کارروائی،افغان طالبان کی چوکیاں اور گاڑیاں تباہ
