ریاض(اے بی این نیوز)عرب میڈیا کے مطابق سعودی عرب نے 23 ستمبر کو ملک بھر میں قومی تعطیل کا اعلان کیا ہے۔سعودی عرب اپنا 95واں قومی دن 23 ستمبر کو پورے قومی جوش و جذبے کے ساتھ منائے گا۔
مملکت سعودی عرب میں قومی دن کے موقع پر شہریوں اور غیر ملکیوں کے لیے عام تعطیل کا اعلان کیا گیا ہے۔پہلی بار قومی دن 1965 میں شاہ فیصل کے دور میں منایا گیا۔اس کے بعد 2005 میں شاہ عبداللہ نے ایک شاہی فرمان کے ذریعے اس دن کو مستقل سرکاری تعطیل کا درجہ دے دیا۔
یہ دن 1932 میں شاہ عبدالعزیز کے اس تاریخی فرمان کی یاد منایا جاتا ہے جس کے تحت نجد اور حجاز کو ملا کر سعودی عرب نامی ریاست قائم کی گئی تھی۔عرب میڈیا کے مطابق اس سال کے قومی دن کا نام ہمارا فخر ہماری فطرت میں ہے جو سعودی عوام کی ثقافتی روایات اور قدرتی ورثے کی عکاسی کرتا ہے۔
23 ستمبر کو قومی دن کے موقع پر مملکت سعودی عرب آتش بازی، ڈرون شو، سعودی ہاکس کے فضائی مظاہرے، ثقافتی پروگرام، روایتی رقص اور مختلف نمائشوں کی میزبانی کرے گی۔جدہ، ریاض اور دمام سمیت بڑے شہروں میں خصوصی تقریبات کا انعقاد کیا جائے گا اور اہم عمارتوں کو سبز روشنیوں سے منور کیا جائے گا۔
مزید پڑھیں: تحریک انصاف نے وزیراعلیٰ گلگت سمیت 12 اراکین اسمبلی کی رکنیت ختم کردی
