لاہور (نیوز ڈیسک) پاکستان تحریک انصاف کی قیادت نے عمران خان کی ممکنہ گرفتاری کے حوالے سے نئی حکمت عملی تیار کرلی، جنوبی پنجاب اور خیبرپختونخوا سے کارکنوں کو زمان پارک بلالیا،عمران خان کی گرفتار ی کے بعد شاہ محمود قریشی پارٹی کے فیصلے کرنے میں بااختیار ہوں گے۔ تفصیلات کے مطابق پاکستان تحریک انصاف کے چیئرمین عمران خان کی ممکنہ گرفتاری کے پیش نظر پی ٹی آئی کی مرکزی قیادت کے ہونے والے اجلاس کی اندرونی کہانی سامنے آگئی۔تحریک انصاف کی نئی حکمت عملی سامنے آگئی، پی ٹی آئی نے سینٹرل پنجاب کے بعد جنوبی پنجاب اور خیبرپختونخوا سے بھی پارٹی کارکنوں کو زمان پارک بلالیا، مرحلہ وار یہ کارکن دن اور رات کے اوقات میں زمان پارک میں ڈیوٹی دیں گے ،کم از کم 5 ہزار پارٹی کارکن زمان پارک کے باہر ہر وقت موجود رہیں گے۔عمران خان کی گرفتاری کے خدشے کے پیش نظر متبادل پارٹی قیادت کا معاملہ بھی طے کرلیا گیا ہے۔چیئرمین پی ٹی آئی کی گرفتاری کی صورت میں شاہ محمود قریشی پارٹی کے فیصلے کرنے میں بااختیار ہوں گے ۔ اجلاس میں اگلے ہفتے سے انتخابی جلسے شروع کرنے کی بھی منظوری دے دی گئی، آئندہ 4 سے 5 روز میں دونوں صوبوں کی ٹکٹیں فائنل کردی جائیں گی۔
