اسلام آباد (اے بی این نیوز) وفاقی تحقیقاتی ادارے (ایف آئی اے) کی جانب سے نوٹس موصول ہونے کے بعد جاز کیش نے 100 سے زائد ایگریگیٹر اکاؤنٹس بند کر دیے ہیں۔
ذرائع کے مطابق ایف آئی اے کی ہدایات پر جاز کیش نے براہِ راست متعدد اکاؤنٹس بند کیے، جبکہ کمپنی کے اندرونی جائزے کے دوران مزید اکاؤنٹس کو مبینہ طور پر مشکوک قرار دے کر معطل کیا گیا۔
ذرائع کا کہنا ہے کہ متاثرہ ایگریگیٹر اکاؤنٹس بڑے پیمانے پر مالی لین دین کر رہے تھے اور کمپنی کے لیے خاطر خواہ آمدنی کا ذریعہ تھے، اس لیے ان اکاؤنٹس کی بندش سے مستقبل میں جاز کیش نے ٹرانزیکشن والیوم اور ایگریگیٹر سے متعلق آمدنی متاثر ہونے کا امکان ہے۔
یہ پیش رفت ایسے وقت میں سامنے آئی ہے جب پاکستان میں غیر قانونی آن لائن جوئے اور مبینہ ڈیجیٹل حوالہ نیٹ ورکس کے لیے موبائل والٹس، بینک اکاؤنٹس اور دیگر ڈیجیٹل ادائیگی ذرائع کے استعمال کے خلاف کارروائیاں تیز کی جا رہی ہیں۔
ستمبر 2026 میں ایف آئی اے نے مبینہ طور پر جوئے کے پلیٹ فارمز سے منسلک مشتبہ مالی لین دین کی تحقیقات بھی کیں، جبکہ پاکستان ٹیلی کمیونیکیشن اتھارٹی (پی ٹی اے) کی جانب سے غیر قانونی جوئے اور غیر منظم تجارتی ایپلی کیشنز کے خلاف بھی کارروائیاں کی گئیں۔
مالیاتی ٹیکنالوجی کے شعبے میں ریگولیٹری نگرانی بڑھنے کے باعث ادائیگی کے بیچوانوں، ایگریگیٹرز اور کلیکشن اکاؤنٹس کی جانچ پڑتال میں بھی اضافہ ہوا ہے۔
تازہ کارروائی کے بعد جاز کیش کے کاروباری لین دین اور ایگریگیٹر سے حاصل ہونے والی آمدنی پر ممکنہ اثرات کے حوالے سے سوالات اٹھ رہے ہیں، جبکہ یہ بھی دیکھا جا رہا ہے کہ جاری تحقیقات کے دوران دیگر موبائل والٹ آپریٹرز کے خلاف بھی اسی نوعیت کے اقدامات ہوتے ہیں یا نہیں۔
مزیدپڑھیں: پاکستان کی سفارتی کامیابی،اقوام متحدہ میں پانی سے متعلق قرار دا دمنظور
