ماسکو (اے بی این نیوز) روس نے انتہائی ہنرمند غیرملکی افراد کے لیے نیا ٹیلنٹ ویزا متعارف کرا دیا ہے، جس کے ذریعے منتخب ماہرین کے لیے روس میں کام کرنے اور مستقل رہائش اختیار کرنے کا عمل پہلے کے مقابلے میں آسان اور تیز ہوسکتا ہے۔
نئے ویزا پروگرام کا مقصد ایسے غیرملکی افراد کو روس کی جانب راغب کرنا ہے جن کی مہارتیں سائنس، ٹیکنالوجی، کاروبار، ثقافت یا کھیل کے شعبوں میں روس کے لیے اہم سمجھی جاتی ہیں۔
یہ پروگرام روس کی وسیع تر امپیٹری ایشن پالیسی کا حصہ ہے۔ اس حوالے سے صدارتی فرمان نمبر 883 دسمبر 2025 میں جاری کیا گیا تھا، جبکہ نیا پروگرام 15 اپریل 2026 سے نافذ العمل ہوگیا۔
کن افراد کو ٹیلنٹ ویزا مل سکے گا؟
حکام کے مطابق یہ سہولت ہر غیرملکی شہری کے لیے نہیں بلکہ غیرمعمولی صلاحیت، اعلیٰ پیشہ ورانہ مہارت، نمایاں تعلیمی قابلیت یا کسی شعبے میں قابل ذکر کامیابی رکھنے والے افراد کے لیے ہے۔
ممکنہ طور پر اس پروگرام میں سائنس دان، محققین، ٹیکنالوجی ماہرین، انجینئرز، ٹیکنالوجی سے وابستہ کاروباری افراد اور خصوصی مہارت رکھنے والے پروفیشنلز شامل ہوسکتے ہیں۔
اس کے علاوہ اعلیٰ معیار کی جامعات سے فارغ التحصیل افراد، فنون و تخلیقی شعبوں سے وابستہ افراد، کھلاڑی اور ایسے کاروباری افراد بھی اس پروگرام کے اہل ہوسکتے ہیں جو روس کی تکنیکی ترقی میں کردار ادا کرنے کی صلاحیت رکھتے ہوں۔
ٹیلنٹ ویزا کے لیے نیا ادارہ قائم
درخواست گزاروں کی صلاحیتوں کا جائزہ لینے کے لیے ایجنسی فار اٹریکٹنگ فارن ٹیلنٹس ٹو رشیا کے نام سے نیا ادارہ قائم کیا گیا ہے۔
ابتدائی جانچ کے بعد درخواست کو معمول کے امیگریشن حکام کے پاس مزید کارروائی کے لیے بھیجا جائے گا۔
مستقل رہائش کے لیے اہم سہولت
ٹیلنٹ ویزا حاصل کرنے والوں کے لیے اہم سہولت یہ ہے کہ وہ عام مقررہ کوٹے کے بغیر عارضی رہائشی اجازت نامے کے لیے درخواست دے سکتے ہیں۔
اس کے علاوہ اس راستے میں روسی زبان سے متعلق وہ عام شرط بھی لاگو نہیں ہوتی جو معمول کے امیگریشن طریقہ کار میں رکاوٹ بن سکتی ہے۔
تاہم جو امیدوار روسی زبان کا مطلوبہ امتحان پاس کرلیتے ہیں، ان کے لیے مستقل رہائش کا راستہ مزید مختصر ہوسکتا ہے۔ ایسے افراد عارضی رہائش کے مرحلے کو چھوڑ کر براہِ راست مستقل رہائشی اجازت نامے کے لیے درخواست دے سکتے ہیں۔
کیا ٹیلنٹ ویزا سے فوری روسی شہریت ملے گی؟
واضح رہے کہ ٹیلنٹ ویزا حاصل کرنا خود بخود روسی شہریت کی ضمانت نہیں ہے۔
البتہ غیرمعمولی کامیابیوں یا متعلقہ روسی سرکاری اداروں کی حمایت کی صورت میں بعض افراد سادہ یا خصوصی طریقہ کار کے تحت روسی شہریت کے اہل ہوسکتے ہیں۔ شہریت کا فیصلہ ہر درخواست گزار کے حالات اور متعلقہ قانونی شرائط کے مطابق ہوگا۔
روس کے نئے پروگرام سے ظاہر ہوتا ہے کہ ملک اپنی امیگریشن پالیسی میں تبدیلی لاتے ہوئے مقررہ کوٹے کے بجائے ایسے غیرملکی ماہرین کو ترجیح دینا چاہتا ہے جو معیشت، سائنس، ٹیکنالوجی، ثقافت اور دیگر شعبوں میں نمایاں کردار ادا کرسکیں۔
اہم بات: یہ عام غیرملکی شہریوں کے لیے تیز رفتار امیگریشن ویزا نہیں بلکہ مخصوص صلاحیت اور نمایاں پیشہ ورانہ کامیابی رکھنے والے افراد کے لیے خصوصی راستہ ہے۔
مزید پڑھٰیں:اساتذہ کے لیے بڑی خبر، حکومت کا اہم فیصلہ سامنے آگیا
