اسلام آباد (اے بی این نیوز) نئے بجٹ کے نفاذ کے بعد کن الیکٹرک گاڑیوں پر فیڈرل ایکسائز ڈیوٹی عائد ہوگی اور کس کو چھوٹ دی جائے گی؟

پاکستان میں نئے بجٹ کا اطلاق یکم جولائی 2026 سے ہو گا۔ نئے بجٹ میں الیکٹرک گاڑیوں پر فیڈرل ایکسائز ڈیوٹی (FED) بھی عائد کی جا رہی ہے۔اس حوالے سے قومی اسمبلی کی فنانس کمیٹی کا اجلاس ہوا، جس میں الیکٹرک گاڑیوں پر ایف ای ڈی کے نفاذ کے معاملے پر غور کیا گیا۔

ایف بی آر حکام نے کمیٹی ممبران کو بتایا کہ 75000 ڈالر تک کی الیکٹرک گاڑیوں پر کوئی فیڈرل ایکسائز ڈیوٹی نہیں ہے۔ یہ ٹیکس پاکستانی کرنسی میں 20 ملین سے زائد مالیت کی الیکٹرک گاڑیوں پر عائد کیا جائے گا جبکہ اس سے کم مالیت کی گاڑیوں پر ٹیکس نہیں ہوگا۔

اس موقع پر رکن شاہدہ اختر نے ایف بی آر حکام سے کہا کہ وہ الیکٹرک گاڑیوں کے ساتھ الیکٹرک چارجنگ اسٹیشنز سے متعلق پالیسی کی وضاحت کریں کیونکہ جب تک ملک میں الیکٹرک چارجنگ اسٹیشنز نہیں ہوں گے گاڑیاں کیسے چلیں گی۔ پاکستان میں بجلی کی صورتحال بھی آپ کے سامنے ہے۔

کمیٹی کی رکن شرمیلا فاروقی نے کہا کہ حکومت کی کوئی پالیسی ہونی چاہیے، الیکٹرک گاڑیوں کو فروغ دینا چاہیے یا نہیں۔ وہ الیکٹرک گاڑیوں سے لگژری زمرہ کو بھی ہٹا رہے ہیں۔

بلال اظہر کیانی نے کہا کہ لگژری الیکٹرک گاڑیوں پر بھی دیگر گاڑیوں کے مقابلے کم ٹیکس ہوتا ہے۔

کمیٹی کی رکن حنا ربانی نے کہا کہ الیکٹرک گاڑیاں آئی سی ای گاڑیوں سے کچھ زیادہ مہنگی ہوتی ہیں۔ آپ الیکٹرک گاڑیوں پر ٹیکس نہیں لگا سکتے، یہ غلط پالیسی ہے۔انہوں نے مزید کہا کہ الیکٹرک گاڑیوں پر 30 فیصد ڈیوٹی پہلے موجود نہیں تھی۔ گاڑیاں بہت تیزی سے ایجاد ہو رہی ہیں، ہر 6 ماہ بعد نئی چیزیں آ رہی ہیں۔
مزید پڑھیں‌:امریکا میں طیارہ گر کر تباہ،اسرائیلی ہلاکتوں کی اطلاعات