ریاض (اے بی این نیوز)سعودی عرب کے شاہی خاندان سے تعلق رکھنے والی معزز شخصیت شہزادی ہند بنت سعود بن عبدالعزیز آل سعود کے انتقال کی خبر سامنے آئی ہے، جس پر سعودی عرب سمیت دنیا بھر میں سوگ کی فضا قائم ہوگئی۔
سعودی خبر رساں ادارے کے مطابق اس افسوسناک خبر کا باضابطہ اعلان شاہی دیوان کی جانب سے کیا گیا، جس میں بتایا گیا کہ شہزادی ہند بنت سعود بن عبدالعزیز آل سعود کا انتقال مملکتِ سعودی عرب سے باہر ہوا۔شاہی دیوان کے اعلامیے میں مرحومہ کے انتقال پر گہرے دکھ اور افسوس کا اظہار کیا گیا اور بتایا گیا کہ ان کی نمازِ جنازہ ریاض کی معروف مسجد، امام ترکی بن عبداللہ مسجد میں ادا کر دی گئی۔
نمازِ جنازہ میں شاہی خاندان کے افراد، اعلیٰ حکومتی شخصیات، علما اور بڑی تعداد میں شہریوں نے شرکت کی، جنہوں نے مرحومہ کے لیے مغفرت اور درجات کی بلندی کی دعا کی۔
اعلامیے میں مزید کہا گیا کہ شاہی دیوان مرحومہ شہزادی کے اہلِ خانہ سے دلی تعزیت کا اظہار کرتا ہے اور اللہ تعالیٰ سے دعا ہے کہ وہ لواحقین کو اس عظیم صدمے پر صبرِ جمیل عطا فرمائے۔
سعودی معاشرے میں شاہی خاندان کی شخصیات کے انتقال کو نہایت احترام اور سنجیدگی کے ساتھ دیکھا جاتا ہے، اور ایسے مواقع پر عوامی سطح پر بھی تعزیتی پیغامات اور دعاؤں کا سلسلہ جاری رہتا ہے۔
واضح رہے کہ گزشتہ ماہ بھی سعودی شاہی خاندان کو ایک اور غم کا سامنا کرنا پڑا تھا، جب شہزادہ مشعل بن بدر بن سعود بن عبدالعزیز آل سعود کی والدہ کا انتقال ہوا تھا۔ ان کی نمازِ جنازہ بھی ریاض کی جامع مسجد امام ترکی بن عبداللہ میں ادا کی گئی تھی، جس کے بعد انہیں مقامی قبرستان میں سپردِ خاک کر دیا گیا تھا۔
مزید پڑھیں: سرکاری محکموں میں پٹرول اور ڈیزل گاڑیوں کی خریداری پر مکمل پابندی عائد
