اسلام آباد (اے بی این نیوز) الیکشن کمیشن آف پاکستان نے کوئٹہ میں بلدیاتی انتخابات ملتوی کر دیئے۔
الیکشن کمیشن کی جانب سے جاری نوٹیفکیشن کے مطابق کوئٹہ میں بلدیاتی انتخابات عدالتی حکم پر ملتوی کیے گئے ہیں۔ 28 دسمبر کو ہونے والے بلدیاتی انتخابات اگلے نوٹس تک ملتوی کر دیئے گئے ہیں۔
اس سے قبل وفاقی آئینی عدالت نے کوئٹہ میں 28 دسمبر 2025 کو ہونے والے بلدیاتی انتخابات کو معطل کر دیا تھا، عدالت نے اٹارنی جنرل آف پاکستان منصور عثمان اعوان، الیکشن کمیشن اور دیگر کو نوٹس جاری کرتے ہوئے تحریری جواب طلب کر لیا۔
عدالت نے بلوچستان ہائی کورٹ کا فیصلہ اور کوئٹہ میں 28 دسمبر کو ہونے والے بلدیاتی انتخابات کے شیڈول کو معطل کرتے ہوئے کیس کی سماعت جنوری کے تیسرے ہفتے تک ملتوی کردی۔جبکہ وفاقی آئینی عدالت کے چیف جسٹس جسٹس امین الدین خان نے ریمارکس دیئے کہ اگر کل انتخابات کو کالعدم قرار دینا ہے تو پھر ایسے انتخابات کرانے کا کیا فائدہ۔
جسٹس عامر فاروق نے ریمارکس دیئے کہ قانون پر عمل نہ کیا گیا تو بے ضابطگیاں پیدا ہوں گی۔
مزید پڑھیں:جسٹس خالد یوسف چوہدری کو سپریم کورٹ کا جج بنانے کی وزیراعظم آزاد کشمیر کی سرکاری ایڈوائس
