لاہور (اے بی این نیوز) عالمی شہرت یافتہ جنوبی افریقی کرکٹر فاف ڈو پلیسس نے پاکستان سپر لیگ (پی ایس ایل) کے 11ویں سیزن میں ایچ بی ایل پی ایس ایل کا حصہ بننے کا اعلان کر دیا۔
14 سال تک آئی پی ایل میں کھیلنے کے بعد فاف ڈو پلیسس نے اس سال نیلامی میں حصہ نہ لینے اور ایک نیا چیلنج قبول کرنے کا فیصلہ کیا۔
فاف ڈو پلیسس نے کہا کہ یہ میرے لیے ایک دلچسپ مرحلہ ہے جس سے مجھے بطور کھلاڑی نئے تجربات اور ترقی کا موقع ملے گا۔
انہوں نے کہا کہ پی ایس ایل میں کھیلنے سے انہیں ایک نئی لیگ کو قریب سے جاننے اور پاکستان کی روایتی مہمان نوازی کے ساتھ ساتھ پرجوش شائقین کے سامنے کھیلنے کا موقع ملے گا۔
انہوں نے مداحوں سے خطاب کرتے ہوئے کہا کہ وہ جلد پاکستان آئیں گے اور مداحوں سے ملاقات کے منتظر ہیں۔
فاف ڈو پلیسس کی شمولیت سے پی ایس ایل میں مزید جوش و خروش اور عالمی معیار کا کھیل آنے کی توقع ہے جو شائقین کو کرکٹ کا ایک منفرد تجربہ فراہم کرے گا۔
یہ فیصلہ پاکستان کرکٹ کے لیے بھی خوش آئند ہے کیونکہ پی ایس ایل میں فاف ڈو پلیسس جیسے عالمی اسٹار کی شمولیت سے لیگ کی مقبولیت اور معیار دونوں میں اضافہ ہوگا۔
یہ خبر شائقین اور کرکٹ برادری کے لیے خوشی کا لمحہ ہے اور تمام نظریں سیزن 11 کے دلچسپ اور سنسنی خیز میچوں پر مرکوز ہوں گی۔
مزید پڑھیں:عدالت نے ایمان مزاری اور ہادی علی چھٹہ کی بریت کی درخواست پر فیصلہ دیدیا















