پشاور (اے بی این نیوز) کوہستان کرپشن سکینڈل کیس میں گرفتار تین ملزمان نے قومی احتساب بیورو (نیب) میں پلی بارگین کی درخواستیں جمع کرا دیں۔
نیب ذرائع کے مطابق 3 ملزمان نے 15 ارب روپے سے زائد کی پلی بارگین کی درخواستیں نیب میں جمع کرائی ہیں تاہم نیب خیبرپختونخوا (کے پی) کے ایگزیکٹو بورڈ کا اجلاس 28 نومبر کو ہوگا جس میں ان درخواستوں کا جائزہ لیا جائے گا۔
نیب ذرائع کا کہنا ہے کہ درخواستوں میں بینک اکاؤنٹس، جائیدادیں، گاڑیاں، سونا اور نقدی ظاہر کی گئی ہے اور ملزمان کی متعدد جائیدادیں رشتہ داروں کے نام بھی ہیں۔
ذرائع کا کہنا ہے کہ پلی بارگین کی درخواستیں چیئرمین نیب کو بھیجنے سے قبل تمام قانونی تقاضے پورے کیے جائیں گے اور جن ملزمان نے درخواستیں جمع کرائی ہیں ان میں نیشنل بینک کے کیشئر ریاض، کنٹریکٹر ایوب اور ممتاز شامل ہیں۔
ملزمان کی جانب سے جمع کرائی گئی پلی بارگین کی درخواستیں نیب کے پی کے ایگزیکٹو بورڈ کی منظوری کے بعد چیئرمین نیب کو بھیجی جائیں گی۔
مزید پڑھیں:ایشیا کپ رائزنگ اسٹارز: سری لنکا کا پاکستان کے خلاف میدان میں اترنے کا فیصلہ
