باکو( اے بی این نیوز)وزیراعظم شہباز شریف اور ترک صدر رجب طیب اردوان کے درمیان آذربائیجان کے دارالحکومت باکو میں ملاقات ہوئی جس میں دوطرفہ تعلقات کے تمام پہلوؤں کا جائزہ لیا گیا۔
اس حوالے سے جاری بیان کے مطابق ملاقات کے دوران چیف آف آرمی سٹاف فیلڈ مارشل عاصم منیر بھی موجود تھے۔
وزیراعظم شہباز شریف اور ترک صدر کے درمیان ملاقات باکو میں یوم فتح کی پریڈ کے موقع پر ہوئی۔
ملاقات میں پاکستان اور ترکی کے درمیان دوطرفہ تعلقات کے تمام پہلوؤں کا جائزہ لیا گیا اور باہمی دلچسپی کے شعبوں میں تعاون کو مزید گہرا کرنے کے عزم کا اعادہ کیا گیا۔
وزیراعظم نے ترکی کے یوم جمہوریہ کے موقع پر صدر اردوان اور ترک عوام کو مبارکباد دیتے ہوئے کہا کہ پاک ترکی دوستی دونوں ممالک کے درمیان گہرے اور پائیدار تعلقات کی مضبوطی کی عکاسی کرتی ہے۔
بیان کے مطابق ملاقات میں اس بات پر اتفاق کیا گیا کہ ترکی کا وزارتی وفد جلد پاکستان کا دورہ کرے گا۔
بیان میں کہا گیا ہے کہ دونوں رہنماؤں نے باہمی تشویش کے علاقائی اور بین الاقوامی مسائل پر قریبی رابطہ کاری جاری رکھنے پر اتفاق کیا اور خطے اور مسلم دنیا میں امن، استحکام اور خوشحالی کے فروغ کے لیے اپنی مشترکہ خواہش کا اعادہ کیا۔
مزید پڑھیں:پی ٹی آئی کا حیران کن قدم! جے یو آئی کو امن جرگے میں شامل ہونے کی پیشکش
