چھاچھرو،میرپورخاص(نیوزڈیسک)پاکستان پیپلز پارٹی کے چیئرمین بلاول بھٹو نے کہا ہے کہ ایک شخص خود کو چوتھی بار وزیر اعظم مسلط کرنے کی کوشش کر رہا ہے۔الیکشن 8 فروری کو ہونے جا رہے ہیں لیکن عوام نے اپنا فیصلہ آج ہی سنادیا ہے، میں تھر کے عوام کے ساتھ ہوں، مجھے بہت خوشی ہورہی ہے۔تھرکول کا منصوبہ میاں صاحب کا ہوتا تو آج وہ یہاں ہوتے۔
ہفتہ کودومختلف مقامات پر جلسے سے خطاب کرتے ہوئے پاکستان پیپلزپارٹی کے چییئرمین بلاول بھٹو نے کہا کہ اس الیکشن میں حصہ لینے والی باقی جماعتیں نفرت اور تقسیم کی سیاست کررہی ہیں، انہوں نے سیاست کو ذاتی دشمنی میں تبدیل کیا ہے جس سے پاکستان اور اس کی معیشت کو ہو رہا ہے، ان کی لڑائی کا بوجھ آپ مہنگائی، بے روزگاری، غربت کی صورت میں اٹھا رہے ہیں۔
مزید پڑھیں:بلوچستان کے عوام تشدد کی سیاست نہ کریں،بلاول بھٹو
بلاول بھٹو زرداری نے کہا کہ کارونجھر کی قیمتی معدنیات کی طرف بڑھنے والے ہاتھ کاٹ دیں گے، میاں صاحب چاہتے ہیں کہ سندھ میں بھی ان کی کٹھ پتلی حکومت ہو، سندھ میں میاں صاحب کے سہولت کار ستارے کے نشان پر لڑ رہے ہیں، ستارے رات میں اچھے لگتے ہیں دن میں نہیں۔
انہوں نے کہا کہ یہ آپ کا اثاثہ ہے ہم ان کا تحفظ کریں گے، اگر کسی کو کاروبار کرنے کا حق ہے تو وہ میرے تھر کے عوام کو حق ہے۔
ان کا کہنا تھا کہ پاکستان پیپلز پارٹی نفرت کی سیاست پر یقین نہیں رکھتی، آپ 8 فروری کو میرا ساتھ دیتے ہیں تو میں آپ کا وزیر اعظم بن کر نفرت اور تقسیم کی سیاست کو دفن کروں گا۔
بلاول نے کہا کہ مجھے امید ہے کہ چھاچھرو کے عوام ہمیں مایوس نہیں کریں گے اور 8 فروری کوچھاچھرو میں تیروں کی بارش ہو گی۔
لاول بھٹو کا کہنا تھا کہ الیکشن 8 فروری کو ہونے جا رہے ہیں لیکن عوام نے اپنا فیصلہ آج ہی سنادیا ہے، میں تھر کے عوام کے ساتھ ہوں، مجھے بہت خوشی ہورہی ہے، میں آپ کا ہوں اور آپ میرے ہیں۔
انہوں نے بتایا کہ میاں صاحب نے غلط بیانی کی کہ تھرکول منصوبہ انہوں نے دیا، اگر تھرکول منصوبہ نواز شریف نے شروع کیا ہوتا تو وہ یہاں جلسہ کرتے، پیپلزپارٹی نے روزگار کے لیے تھرکول منصوبہ شروع کیا تھا، 8 فروری کے بعد تھرکول منصوبے پر مزید کام ہوگا۔
سابق وزیر خارجہ نے کہا کہ انتخابات کے لیے صرف میں ووٹ مانگ رہا ہوں باقی ادھر ادھر دیکھ رہے ہیں، یہ چاہتے ہیں ان کی کٹھ پتلی حکومت کراچی میں بیٹھ کر عوام کےحق پر ڈاکا ڈالے، میاں صاحب کے سہولت کار سندھ میں الیکشن لڑ رہے ہیں، باقی سیاسی جماعتیں نفرت اور تقسیم کی سیاست کررہی ہیں مگر پیپلز پارٹی انتقام کی سیاست پر یقین نہیں رکھتی ہے۔
ان کا مزید کہنا تھا کہ ہم نے اسلام کوٹ میں ایئرپورٹ بنا کر دیا، حکومت ملی تو میں غریب عوام کے لیے 30 لاکھ گھر بنا کر دوں گا، آپ کی آمدنی دوگنی کر کے دکھاؤں گا، تھرپارکر میں گرین انرجی سولر پارکس بناؤں گا۔
پی پی پی چیئرمین نے کہا کہ لاہور تک یہ آواز جانی چاہیے کہ تھرکول کا منصوبہ کس نے دیا؟ پیپلز پارٹی نے مقامی لوگوں کو معاشی فائدہ پہنچانے کے لیے منصوبہ شروع کیا، الیکشن کے بعد تھرکول منصوبے پر مزید کام ہوگا، تھر پارکر سے کراچی تک ٹرین سروس شروع کریں گے، ٹرین سروس کے ذریعے کوئلہ تھر سے کراچی لایا جائے گا، پہلے ہم نے سڑکیں بنائیں پھر اسلام کوٹ میں ایئرپورٹ بنایا۔
