اسلام آباد ( اے بی این نیوز) نگران وفاقی وزیر انفارمیشن ٹیکنالوجی( آئی ٹی) ڈاکٹر عمر سیف نے دعویٰ کیا ہے کہ وزارت آئی ٹی کے اقدامات سے آئی ٹی برآمدات میں 32 فیصد اضافہ ہوا ہے،ذرائع کے مطابق پاکستان موبائل سمٹ سے خطاب کرتے ہوئے نگران وزیر کا کہنا تھا کہ اس سال کسی بھی وقت آئی ٹی برآمدات 5 ارب لاگت کی حد پار کر لیں گے اور آنے والے دنوں میں موبائل فونز کی برآمدات پر فوکس کیا جائیگا،مزید بتایا کہ موبائل پالیسی کے باعث موبائل فونز پاکستان میں بننا شروع ہوگئے ہیں، اب تک 5.7 کروڑ موبائل فونز پاکستان میں بن چکے ہیں، مقامی سطح پر فائبر کیبل کی تیاری میں بھی پیشرفت ہوئی ہے، مقامی سطح پر 4 کمپنیاں فائبر کیبل بنا رہی ہیں،ڈاکٹر عمر سیف کا کہنا تھا کہ 300 میگا ہرٹس اسپیکٹرم نیلامیکیلئے پیش کرینگے، اسکے علاوہ جولائی اگست میں 5 جی اسپیکٹرم بھی نیلامیکیلئے پیش کرینگے، 5 جی سپیکٹرم کی نیلامی آسان شرائط پر رکھیں گے اور ایسی پالیسی لائیں گے کہ کمپنیاں انفرااسٹرکچر پر سرمایہ کاری کرسکیں گی، امید ہے ٹیلی کام انڈسٹری اسپیکٹرم کی نیلامی میں کھلے دل سے حصہ لے گی،انہوں نے کہا کہ گزشتہ 3 سال میں پاکستان میں آئی ٹی اور الیکٹرانکس کے شعبے میں کام ہوا ، گزشتہ 3 سال میں آئی ٹی، الیکٹرانکس کے حوالے سے پالیسیز بھی بنی ہیں، موبائل پالیسی کے باعث ہی موبائل فون پاکستان میں بننا شروع ہوئے ہیں اور 35 برانڈز پاکستان میں موبائل فونز بنا رہے ہیں،نگران وزیر نے بتایا کہ حکومت نے موبائل مینو فیکچررز کو 3 فیصد ریسرچ اینڈ ڈیولپمنٹ الاؤنسز (آر اینڈ ڈی) الاؤنس دینے کا فیصلہ کیا ہے اور اگلے مالی سال سے پہلے یہ الاؤنس موبائل کمپنیوں کو ملنا شروع ہو جائیگا، مزید یہ کہ اس الاؤنس کو 3 فیصد سے بڑھا کر 8 فیصد کیا جائیگا،انہوں نے کہا کہ وزارت آئی ٹی نے انفرااسٹرکچر شئیرنگ فریم ورک بنایا ہے، اس کے علاوہ وزارت آئی ٹی نیشنل فائبریزیشن پالیسی پر بھی کام کررہی ہے، حکومت نے کیبل بچھانےکیلئے اسٹینڈرائزیشن کی ہے اور اس اقدام سے فائبر بچھانے کی لاگت میں 300 فیصد کمی آئی ہے،ڈاکٹر عمر سیف کا کہنا تھا کہ حکومت کیجانب سے اسپیس پالیسی بھی تیار کی گئی ہے،اسپیس پالیسی سے کمپنیاں صارفین کو کہیں بھی انٹرنیٹ دے سکیں گی۔