اسلام آباد ( اے بی این نیوز )اسلام آباد، لاہور اور فیصل آباد سمیت ملک کے مختلف علاقوں میں بارش کا امکان ہے، جبکہ بالائی علاقوں میں برفباری کی پیشگوئی بھی کی گئی ہے۔ این ڈی ایم اے کے نیشنل ایمرجنسیز آپریشن سینٹر نے سندھ، پنجاب، بلوچستان اور خیبر پختونخوا کے متعدد علاقوں کے لیے موسمی الرٹ جاری کر دیا ہے۔ آئندہ 24 سے 48 گھنٹوں کے دوران پنجاب کے بیشتر اضلاع میں موسلا دھار بارش متوقع ہے۔ اسلام آباد، راولپنڈی، لاہور، گوجرانوالہ، فیصل آباد، سرگودھا اور ملحقہ علاقوں میں بارش کا امکان ظاہر کیا گیا ہے، جبکہ مری اور اس کے گرد و نواح کے پہاڑی علاقوں میں برفباری ہو سکتی ہے۔
اسی طرح خیبر پختونخوا کے بیشتر اضلاع میں بھی بارش اور بالائی علاقوں میں برفباری کی توقع ہے۔ چترال، دیر، سوات، شانگلہ، کوہستان، ناران، کاغان اور گلیات میں برف پڑنے کا امکان ہے۔این ڈی ایم اے نے خبردار کیا ہے کہ بارش اور برفباری کے باعث سڑکوں پر پھسلن پیدا ہو سکتی ہے اور ٹریفک کی روانی متاثر ہونے کا خدشہ ہے۔ عوام کو ہدایت کی گئی ہے کہ وہ غیر ضروری سفر سے گریز کریں اور احتیاطی تدابیر اختیار کریں۔
ریسکیو اور سڑکوں کی بحالی کے لیے متعلقہ اداروں کو الرٹ رہنے کی ہدایت بھی جاری کر دی گئی ہے۔ نیشنل ایمرجنسیز آپریشن سینٹر صورتحال پر مسلسل نظر رکھے ہوئے ہے اور عوام و اداروں کو پیشگی آگاہی فراہم کی جا رہی ہے۔
مزید پڑھیں :عمران خان کے حوالے سے خوشخبری،اہم پیش رفت سامنے آگئی،جا نئے کیا
