کوئٹہ (اوصاف نیوز) کوئٹہ کے علاقے قمبرانی روڈ پر یکے بعد دیگرے دو دھماکے ہوئے، جس میں پولیس چوکی اور کاؤنٹر ٹیررازم ڈیپارٹمنٹ (سی ٹی ڈی) کی گاڑی کو نشانہ بنایا گیا تاہم ان دھماکوں میں کوئی جانی نقصان نہیں ہوا۔
ذرائع کے مطابق پولیس کا کہنا ہے کہ پہلا دھماکا قمبرانی روڈ کے قریب اس وقت ہوا جب نامعلوم موٹر سائیکل سوار ملزمان نے پولیس چیک پوسٹ پر دستی بم پھینکا۔
دوسرا دھماکا، جو ایک دیسی ساختہ بم (آئی ای ڈی) کے ذریعے کیا گیا، اسی علاقے میں اس وقت ہوا جب شرپسندوں نے پہلے دھماکے کی جگہ کی طرف جانے والی سی ٹی ڈی کی گاڑی کو نشانہ بنانے کی کوشش کی۔
پولیس کے مطابق آئی ای ڈی دھماکے سے گاڑی محفوظ رہی اور سی ٹی ڈی کے تمام اہلکار محفوظ ہیں۔ دیسی ساختہ بم موٹر سائیکل میں نصب کیا گیا تھا اور اسے دور سے دھماکا کیا گیا۔
مزید پڑھیں:یو اے ای ویزوں سے متعلق اماراتی قونصل جنرل کا بیان سامنے آ گیا
