مظفرآباد، اسلام آباد(نیوزڈیسک)ملک بھر میں موسم سرد اور خشک رہے گا، آزادکشمیر اور بالائی علاقوں گلگت بلتستان کے مختلف حصوں میں برفباری کے بعد کہیں موسم آبرآلود تو کہیں دھوپ کا سماں ، محکمہ شاہرات کے مطابق آزادکشمیر کے برفانی علاقوں میں سڑکوں کی بحالی کاکام جاری ہے۔
برفباری کے 6روزبعدبھی وادی لیپہ کا زمینی رابطہ بحال نہیں ہوسکا ، راستے نہ کھلنے کے باعث ایک لاکھ کی آبادی محصور ہو کر رہ گئی ۔محکمہ موسمیات نے ملک کے بیشتر علاقوں میں موسم سرد اور خشک رہنے کا امکان ظاہر کیا ۔ اسلام آباد، مر ی، گلیات اور گردو نواح میں موسم سرد رہے گا۔
بلوچستان کے بیشتر اضلاع میں سردی کی شدت برقرار رہنے کی پیشگوئی ہے جبکہ بالائی بلوچستان کے بیشتر علاقوں میں تیز ہوائیں چلنے کا امکان ہے۔سندھ کے بیشتر اضلاع میں موسم خشک رہنے کی پیشگوئی ہے جبکہ خیبرپختونخواکے بالائی علاقوں میں سردی کی شدت برقرار رہنے کا امکان ہے۔
