لاہور(اے بی این نیوز) انٹرنیشنل کرکٹ کونسل (آئی سی سی) نے ٹی ٹوئنٹی ورلڈکپس کی تاریخ کی آئیکونک پرفارمنس کی فہرست جاری کر دی جس میں پاکستان کے سابق آل راؤنڈر شاہد آفریدی کا نام بھی شامل کیا گیا۔
آئی سی سی کے مطابق 2009ء کے ٹی ٹوئنٹی ورلڈکپ میں شاہد آفریدی کی شاندار آل راؤنڈر کارکردگی کو آئیکونک قرار دیا گیا، آفریدی نے سیمی فائنل میں 51 رنز بنانے کے ساتھ 2 اہم وکٹیں حاصل کر کے پاکستان کو فائنل میں پہنچایا جبکہ فائنل میں بھی انہوں نے 40 گیندوں پر 54 رنز کی میچ وننگ اننگز کھیلی تھی۔
فہرست کے مطابق 2007ء میں ٹی ٹوئنٹی ورلڈکپ کے پہلے ایڈیشن میں یووراج سنگھ کے ایک اوور میں 6 چھکوں کو آئیکونک پرفارمنس قرار دیا گیا، 2010ء کے ورلڈکپ میں آسٹریلیا کے مائیک ہسی کی پاکستان کے خلاف 24 گیندوں پر 60 رنز کی اننگز کو بھی اس فہرست میں شامل کیا گیا۔
آئی سی سی نے 2012ء کے ورلڈکپ میں ویسٹ انڈیز کے سنیل نارائن کی 9 رنز کے عوض 3 وکٹوں کو آئیکونک پرفارمنس قرار دیا، اسی طرح 2014ء کے ورلڈکپ کے سیمی فائنل میں سری لنکا کے رنگانا ہیراتھ کی 5 وکٹیں بھی اس فہرست کا حصہ بنیں۔
2016ء کے ٹی ٹوئنٹی ورلڈکپ میں کارلوس بریتھویٹ کے فائنل میں لگائے گئے 4 مسلسل چھکوں، 2021ء کے ورلڈکپ فائنل میں مچل مارش کی 77 رنز کی اننگز اور 2022ء کے ورلڈکپ میں انگلینڈ کے بین سٹوکس کی پاکستان کے خلاف 52 رنز کی اننگز کو بھی آئیکونک پرفارمنس قرار دیا گیا۔
حالیہ 2024ء کے ٹی ٹوئنٹی ورلڈکپ میں بھارت کے ویرات کوہلی کی 76 رنز کی شاندار اننگز کو بھی آئی سی سی نے آئیکونک پرفارمنس کی فہرست میں شامل کر لیا ہے۔
مزید پڑھیں۔پی ٹی آئی کے سینیٹر سیف اللہ ابڑو کو ریلیف مل گیا، نااہلی ریفرنس خارج
