لاہور(اے بی این نیوز) پاکستان اور بھارت کی ٹیمیں ایک مرتبہ پھر آئی سی سی ایونٹ میں آمنے سامنے ہوں گی۔ دونوں ٹیمیں مینز ٹی ٹوئنٹی ورلڈکپ 2026 میں 15 فروری کو مدمقابل ہوں گے۔
ذرائع کے مطابق پاک بھارت میچ سری لنکا کے دارالحکومت کولمبو میں کھیلا جائے گا۔ آئی سی سی نے اس سال ٹورنامنٹ کے گروپ تشکیل دیتے ہوئے پاکستان کو بھارت، امریکا، نیدرلینڈز اور نمیبیا کے ساتھ ایک ہی گروپ میں رکھا ہے، جو کہ ایک متوازن مگر چیلنجنگ گروپ تصور کیا جا رہا ہے۔ ماہرین کے مطابق پاکستان کے لیے بھارت کے خلاف میچ نہ صرف پوائنٹس ٹیبل کے لحاظ سے اہم ہو گا بلکہ جذباتی سطح پر بھی اس میچ کی اپنی ہی اہمیت ہوتی ہے۔
ذرائع کا کہنا ہے کہ آئی سی سی مینز ٹی ٹوئنٹی ورلڈکپ کے مکمل شیڈول کا حتمی اعلان 25 نومبر کو ممبئی میں متوقع ہے۔ اس اعلان کے بعد تمام ٹیموں کے میچز کی تاریخوں، وینیوز اور ٹائمنگز کی باضابطہ تفصیلات سامنے آجائیں گی۔ اگرچہ ابھی تک شیڈول فائنل نہیں ہوا، تاہم ابتدائی معلومات کے مطابق پاکستان کی ٹیم اپنے تمام گروپ میچز سری لنکا میں ہی کھیلے گی۔
تجزیہ کاروں کا کہنا ہے کہ پاکستان کے گروپ میں شامل دیگر ٹیمیں امریکا، نیدرلینڈز اور نمیبیا بھی حیران کن کارکردگی دکھانے کی صلاحیت رکھتی ہیں، اس لیے پاکستان کو ہر میچ میں بہترین کارکردگی دکھانا ہوگی۔ خاص طور پر بھارت کے خلاف میچ میں فتح پورے گروپ کے ماحول کو پاکستان کے حق میں موڑ سکتی ہے۔
مزید پڑھیں۔پنجاب: 13 قومی وصوبائی حلقوں میں ضمنی انتخابات کیلئے سیکیورٹی انتظامات مکمل
