اسلام آباد ( اے بی این نیوز )چیمپیئنز ٹرافی کا بڑا مقابلہ پاک بھارت میچ کل اتوار کو دبئی میں ہونے جا رہا ہے، جسے کراچی اور سندھ کے مختلف علاقوں میں بڑی اسکرینوں پر دکھانے کا انتظام کیا گیا ہے۔
کراچی میں کرکٹ شائقین کے لئے بڑی اسکرینیں کورنگی نمبر 5، ساحل سمندر (نشان پاکستان)، پیپلز ہاؤس (نیئر انڈس اسپتال) اور گلستان جوہر یوتھ کلب (نیئر دارالصحت اسپتال) میں نصب کی جائیں گی۔
حیدرآباد میں بڑی اسکرین سندھ اسپورٹس بورڈ ہاسٹل (نیاز اسٹیڈیم)، گھوٹکی کے سردار غلام محمد خان مہر اسپورٹس کمپلیکس میں بھی لگائی جائے گی، جبکہ خیرپور کے ممتاز گراؤنڈ میں کرکٹ شائقین کے لئے یہ سہولت فراہم کی جائے گی۔
شہید بینظیر آباد میں بیڈ منٹن ہال (بلاول اسپورٹس کمپلیکس)، شکارپور کے یوتھ ڈویلپمنٹ سینٹر، ٹھٹہ، ملیر اسپورٹس کمپلیکس، دادو اور دیگر اضلاع میں بھی کرکٹ شائقین کو بڑی اسکرین پر پاک بھارت میچ دیکھنے کا موقع ملے گا۔
یہ اقدام سندھ حکومت اور اسپورٹس بورڈ کی جانب سے عوام کی پذیرائی کا باعث بن رہا ہے، جہاں کرکٹ کے دیوانے اپنے خاندان اور دوستوں کے ساتھ اس میچ کا مزہ لے سکیں گے۔
