کراچی ( اے بی این نیوز )ریجنل کرکٹ ایسوسی ایشن کے لیے بڑی خوشخبری سامنے آ گئی ہے۔ ایسوسی ایشن کراچی کے صدر ندیم عمر نے زونل عہدیداران کو ٹورنامنٹس کے لیے تین تین لاکھ روپے کے چیک دیے اور اس عزم کا اظہار کیا کہ وہ آئندہ بھی کرکٹ کے فروغ کے لیے زونز کے ساتھ ہر ممکن تعاون جاری رکھیں گے۔
ندیم عمر نے اس موقع پر کہا کہ ہم سب کی مشترکہ کوشش ہے کہ شہر میں کلب کرکٹ کو زیادہ سے زیادہ فروغ دیا جائے تاکہ اسی پلیٹ فارم سے نئے کھلاڑی ابھر کر سامنے آئیں۔ انہوں نے مزید بتایا کہ آئندہ کلبز کے دو روزہ ٹورنامنٹس بھی کرانے کی کوشش کی جائے گی تاکہ کھلاڑی بڑی کرکٹ کے لیے بہتر طور پر تیار ہو سکیں۔ ہمارے زونل عہدیداران کے ساتھ ساتھ توصیف صدیقی اور خالد نفیس کراچی ریجن کا قیمتی اثاثہ ہیں جو ہمہ وقت شہر کی کرکٹ کو بہتر سے بہتر بنانے کے لیے کوشاں رہتے ہیں۔
تقریب سے خطاب کرتے ہوئے قائم مقام سیکریٹری محمد توصیف صدیقی نے کہا کہ گزشتہ دو سال میں کراچی میں ریجن اور زونز نے جتنی کرکٹ کرائی ہے، اس کی ماضی میں مثال نہیں ملتی۔ انہوں نے یاد دلایا کہ ندیم عمر نے حال ہی میں زونز کو ٹورنامنٹس کے لیے ایک ایک لاکھ روپے بھی دیے تھے، جو کلب کرکٹ کے لیے بڑا سہارا ثابت ہوئے۔
چیئرمین ٹورنامنٹ کمیٹی خالد نفیس نے کہا کہ صدر ریجنل کرکٹ ایسوسی ایشن کراچی نہ صرف ٹورنامنٹس کے لیے فنڈز فراہم کرتے ہیں بلکہ کھلاڑیوں کی بھی بھرپور حوصلہ افزائی کرتے رہتے ہیں۔ انہوں نے مزید بتایا کہ ندیم عمر کرکٹ کے علاوہ دیگر کھیلوں کی بھی سرپرستی کرتے ہیں۔
اس موقع پر کے سی سی اے اسٹیڈیم کی اپ گریڈیشن کا بھی ذکر ہوا، جہاں ندیم عمر نے کروڑوں روپے خرچ کر کے اسٹیڈیم کو اس قابل بنایا کہ وہاں دوبارہ فرسٹ کلاس میچز اور نیشنل ون ڈے ٹورنامنٹ کے میچز کھیلے جا رہے ہیں۔ اب کے سی سی اے اسٹیڈیم کا موازنہ پاکستان کے کسی بھی بڑے اسٹیڈیم سے کیا جا سکتا ہے۔
تقریب میں وصال انصاری، سید محمد احمد نقوی، شہباز قریشی، اعظم خان، ایس ایم عاصم اور دیگر معززین بھی شریک ہوئے۔ سوشل میڈیا پر بھی اس اقدام کو کراچی کرکٹ کے لیے ایک بڑا بریک تھرو قرار دیا جا رہا ہے اور شائقین اسے گراس روٹ لیول پر کرکٹ کی بحالی کی جانب اہم قدم کہہ رہے ہیں۔
مزید پڑھیں :موسم نے لی انگڑائی، اسلام آباد میں بارش،سردی میں اضافہ،برفباری کی پیشگوئی
