لندن (اے بی این نیوز)ویسٹ انڈیز کے جارحانہ آل راؤنڈر آندرے رسل نے بھارتی پریمیئر لیگ (آئی پی ایل) سے ریٹائرمنٹ کا اعلان کر دیا، تاہم وہ کولکتہ نائٹ رائیڈرز کے ہمراہ بطور ’پاور کوچ‘ اپنی خدمات جاری رکھیں گے۔
رسل کو 2025 کے ناکام سیزن کے بعد کولکتہ ٹیم نے ریلیز کر دیا تھا اور انہوں نے فیصلہ کیا ہے کہ وہ 16 دسمبر کو ہونے والی آئی پی ایل نیلامی میں اپنا نام شامل نہیں کریں گے۔37 سالہ رسل آئی پی ایل چھوڑنے کے باوجود کریبین پریمیئر لیگ سمیت دنیا بھر کی دیگر ٹی ٹوئنٹی لیگوں میں کھیلتے رہیں گے۔
انہوں نے کہا کہ “سب سے بہتر وقت وہ ہوتا ہے جب فینز پوچھیں کہ کیوں جا رہے ہو، آپ میں اب بھی بہت کچھ باقی ہے۔رسل کے مطابق وہ 2026 میں کولکتہ کی ٹیم میں بطور سپورٹ اسٹاف واپس آئیں گے اور ’پاور کوچ‘ کا کردار نبھائیں گے۔
ان کا کہنا تھا کہ یہ عہدہ ان کی شناخت سے پوری طرح میل کھاتا ہے، کیونکہ ان کی بیٹنگ میں طاقت اور گیند کے ساتھ توانائی نوجوان کھلاڑیوں کی تربیت میں مدد دے سکتی ہے۔آندرے رسل نے 2012 میں دہلی سے آئی پی ایل کا آغاز کیا اور 2014 میں کولکتہ نائٹ رائیڈرز میں شامل ہونے کے بعد دو مرتبہ لیگ ٹائٹل جیتا۔
انہوں نے آئی پی ایل میں مجموعی طور پر 140 میچ کھیلے۔دوسری جانب جنوبی افریقی بیٹر فاف ڈو پلیسی نے بھی آئی پی ایل کے اگلے سیزن سے دستبرداری کا اعلان کیا ہے اور وہ پاکستان سپر لیگ میں شرکت کریں گے۔انہوں نے کہا کہ بھارت ان کے دل میں خاص مقام رکھتا ہے اور یہ مکمل الوداع نہیں، وہ مستقبل میں پھر لوٹیں گے۔
مزید پڑھیں: سابق بنگلہ دیشی وزیراعظم خالدہ ضیاء کی حالت تشویشناک
