لاہور(اے بی این نیوز)پاکستان کرکٹ بورڈ نے جنوبی افریقہ اور سہ ملکی سیریز کیلئے قومی وائٹ بال اسکواڈز کا اعلان کر دیا۔پی سی بی کے مطابق ٹی 20 انٹرنیشنل کیلئے 15 رکنی اور ون ڈے کیلئے 16 رکنی سکواڈ کا اعلان کیا گیا ہے، بابر اعظم اور نسیم شاہ کی ٹی 20 ٹیم میں واپسی ہوئی ہے۔
پاکستان اور جنوبی افریقہ کے درمیان ٹی 20 سیریز 28 اکتوبر سے یکم نومبر تک جبکہ ون ڈے سیریز 4 سے 8 نومبر تک کھیلی جائیگی۔
سری لنکا اور زمبابوے کے ساتھ سہ ملکی سیریز 17 سے 29 نومبر تک راولپنڈی اور لاہور میں کھیلی جائے گی جس کے بعد پاکستان اور سری لنکا کے درمیان ون ڈے سیریز 11 سے 15 نومبر تک راولپنڈی کرکٹ سٹیڈیم میں کھیلی جائے گی۔
عثمان طارق پہلی بار ٹی 20 انٹرنیشنل سکواڈ میں جگہ بنانے میں کامیاب ہوئے ہیں ، بابر اعظم، عبدالصمد اور نسیم شاہ کی ٹی 20 ٹیم جبکہ فیصل اکرم، حارث رؤف اور حسیب اللہ کی ون ڈے اسکواڈ میں واپسی ہوئی ہے۔
پاکستان کرکٹ بورڈ کے مطابق سلمان علی آغا ٹی 20 انٹرنیشنل اور شاہین شاہ آفریدی ون ڈے انٹرنیشنل ٹیم کی قیادت کریں گے۔قومی ٹی 20 اسکواڈ میں سلمان علی آغا (کپتان)، عبدالصمد، ابرار احمد، بابر اعظم، فہیم اشرف، حسن نواز، محمد نواز، محمد وسیم جونیئر، سلمان مرزا، نسیم شاہ، صاحبزادہ فرحان (وکٹ کیپر)، صائم ایوب، شاہین شاہ آفریدی، عثمان خان (وکٹ کیپر) اور عثمان طارق شامل ہیں۔
فخر زمان، حارث رؤف اور سفیان مقیم ریزرو کھلاڑی ہوں گے۔ون ڈے اسکواڈ شاہین شاہ آفریدی (کپتان)، ابرار احمد، بابر اعظم، فہیم اشرف، فیصل اکرم، فخر زمان، حارث رؤف، حسیب اللہ، حسن نواز، حسین طلعت، محمد نواز، محمد رضوان (وکٹ کیپر)، محمد وسیم جونیئر، نسیم شاہ، صائم ایوب اور سلمان علی آغا پر مشتمل ہو گا۔
مزید پڑھیں: بجلی اور گیس کنکشنز کی تبدیلی کے لئے نیا طریقہ کار متعارف
