کراچی ( اے بی این نیوز )پاکستان سپر لیگ (پی ایس ایل) سیزن 10 میں کراچی کنگز کو ایک بڑا نقصان برداشت کرنا پڑا ہے، نیوزی لینڈ کے فاسٹ بولر ایڈم ملنے گھٹنے کی انجری کے باعث ایونٹ سے باہر ہو گئے ہیں۔
15 اپریل کو لاہور قلندرز کے خلاف میچ کے دوران ایڈم ملنے انجری کا شکار ہوئے تھے، جس کے بعد ان کی شرکت مشکوک ہو گئی تھی۔ طبی معائنے کے بعد اب تصدیق ہو گئی ہے کہ وہ ٹورنامنٹ کے باقی میچز میں شرکت نہیں کر سکیں گے۔
کراچی کنگز کی مینجمنٹ نے ایڈم ملنے کی خدمات پر ان کا شکریہ ادا کیا اور ان کی جلد صحتیابی کے لیے نیک تمناؤں کا اظہار کیا ہے۔ ایڈم ملنے نے انجری سے قبل کراچی کنگز کے دو میچز میں شرکت کی تھی۔
ان کی جگہ ٹیم میں نوجوان کھلاڑی اور پاکستان انڈر 19 ٹیم کے کپتان سعد بیگ کو شامل کر لیا گیا ہے، جو سیزن کے باقی میچز میں اسکواڈ کا حصہ ہوں گے۔
دوسری جانب کراچی کنگز کو گزشتہ روز کوئٹہ گلیڈی ایٹرز کے ہاتھوں سنسنی خیز مقابلے میں 5 رنز سے شکست کا سامنا کرنا پڑا۔ پوائنٹس ٹیبل پر کراچی کنگز 6 پوائنٹس کے ساتھ فی الحال دوسرے نمبر پر موجود ہے۔
