لاہور(اے بی این نیوز)لاہور، راولپنڈی اور ملتان میں پاکستان سپر لیگ کے میچز کی سکیورٹی کےلئے فوج اور رینجرز کے دستے طلب کرلئے گئے۔ محکمہ داخلہ پنجاب نے وفاقی وزارت داخلہ کو درخواست بھجوا دی ہے۔
محکمہ داخلہ پنجاب کے مطابق فول پروف سکیورٹی میں پولیس کی معاونت کے لئے فوج اور رینجرز کے دستے طلب کئے گئے ہیں۔ لاہور، راولپنڈی اور ملتان کےلئے رینجرز کے 1، 1 ونگ اور آرمی کی 2، 2 کمپنیوں کی خدمات طلب کی گئی ہیں۔
محکمہ داخلہ پنجاب نے درخواست میں کہا ہے کہ پی ایس ایل میں بین الاقوامی کرکٹرز اور میچ آفیشلز حصہ لے رہے ہیں۔ ملکی و غیر ملکی کھلاڑیوں، میچ آفیشلز اور عملے کی شرکت کے باعث یہ ہائی پروفائل ایونٹ ہے۔درخواست میں کہا گیا ہے کہ لاہور، راولپنڈی اور ملتان میں میچز، ٹیموں کے قیام اور سفر کے دوران فول پروف سکیورٹی انتظامات کیےجائیں گے۔
واضح رہے کہ پاکستان سپرلیگ ایڈیشن 10کے میچز11 اپریل سے18 مئی تک شیڈول ہیں، پاکستان سپر لیگ میں بین الاقوامی کرکٹرز اور میچ آفیشلز شرکت کررہے ہیں۔ سیکیورٹی کیلئے دستوں کی خدمات6 اپریل سے19 مئی تک طلب کی گئی ہیں۔
مزید پڑھیں: عالمی منڈی میں تیل اور گیس کی قیمت میں کمی
