اسلام آباد ( اے بی این نیوز )پاکستان کرکٹ بورڈ (پی سی بی) نے نئے کرکٹرز کو تلاش کرنے کے لیے ٹیلنٹ ہنٹ پروگرام شروع کرنے کا فیصلہ کیا ہے۔ پی سی بی کے سی او او سمیر احمد سید، چیئرمین کے مشیر عامر میر اور دیگر حکام نے قذافی اسٹیڈیم میں پریس کانفرنس کے دوران اس پروگرام کا اعلان کیا۔
عامر میر نے کہا کہ پی سی بی اسکولوں اور کالجوں کی سطح پر ٹیلنٹ ہنٹ پروگرام شروع کرنے جا رہا ہے۔ ان کا کہنا تھا کہ اس پروگرام کا مقصد کرکٹ کا فروغ اور نئے ٹیلنٹ کی شناخت ہے۔ اگلے ماہ سے پروگرام کی رجسٹریشن کا عمل شروع ہو جائے گا۔
چیئرمین پی سی بی کے مشیر نے مزید کہا کہ اس پروگرام کے ذریعے اسکولوں سے لے کر انڈر16 تک کی کھلاڑیوں کی منتخب کھیپ سامنے آئے گی۔ اس پروگرام کا مقصد گراس روٹ لیول پر کرکٹ کو بہتر بنانا ہے، جہاں ٹرائلز کے بعد منتخب کھلاڑیوں کو خصوصی تربیت دی جائے گی۔ کوچز ان کھلاڑیوں کی مہارت کو نکھار کر انہیں قومی ٹیم کا حصہ بنانے میں مدد فراہم کریں گے۔ اس سے بچوں اور بچیوں کو قومی ٹیم میں جگہ بنانے کے مزید مواقع ملیں گے۔
سی او او سمیر احمد نے بتایا کہ پی سی بی ٹیلنٹ ہنٹ پروگرام کی رجسٹریشن 10 اپریل سے شروع ہوگی۔ انہوں نے کہا کہ ستمبر سے نومبر تک 40 اوورز کے میچز پر مشتمل ایک ٹورنامنٹ کا انعقاد کیا جائے گا۔ میچز کے دوران پی سی بی کے آفیشلز اور امپائرز موجود ہوں گے۔ بہترین کھلاڑیوں کو پی سی بی کی جانب سے کوچنگ اور دیگر سہولتیں فراہم کی جائیں گی۔
