اسلام آباد ( اے بی این نیوز )پاکستان کے فاسٹ بولر حارث رؤف نے نیوزی لینڈ کے خلاف سیریز کے تیسرے ٹی20 انٹرنیشنل میچ میں اہم سنگ میل عبور کیا۔ آکلینڈ میں کھیلے گئے اس میچ میں حارث رؤف نے اپنے کیریئر کی 200 ویں بین الاقوامی وکٹ حاصل کی۔
حارث رؤف نے یہ کارنامہ اس وقت انجام دیا جب انہوں نے نیوزی لینڈ کے کپتان مائیکل بریس ویل کو آخری اوورز میں آؤٹ کیا۔ اس کے ساتھ ہی وہ ٹی20 انٹرنیشنل میں 200 وکٹیں لینے والے 24ویں پاکستانی کھلاڑی بن گئے ہیں۔ تاہم، قومی ٹیم کی جیت میں اہم کردار ادا کرنے والے نوجوان اوپنر حسن نواز کی 44 گیندوں پر بنائی گئی سنچری اور ان کے ریکارڈز نے حارث رؤف کے کارنامے کو پیچھے دھکیل دیا۔
حسن نواز نے گزشتہ روز پاکستان کے لیے تیز ترین ٹی20 سنچری کا ریکارڈ اپنے نام کیا۔ اس سے قبل یہ ریکارڈ بابر اعظم کے پاس تھا، جنہوں نے 49 گیندوں پر سنچری بنائی تھی۔ حسن نواز نے کیویز کے خلاف یہ کارنامہ صرف 44 گیندوں پر انجام دیا، ان کی اننگز میں 10 چوکے اور 7 چھکے شامل تھے۔
