ممبئی (اے بی این نیوز)چیمپئنز ٹرافی کے آغاز سے ہی کرکٹ کا بخار سر چڑھ کر بول رہا ہے اور پاکستان کی میزبانی میں ہونے والی چیمپئنز ٹرافی کے ایونٹ میں بھارت اپنے تمام میچز دبئی میں کھیل رہا ہے۔
چیمپئنز ٹرافی کا سب سے بڑا مقابلہ 23 فروری کو دبئی میں پاک بھارت ٹیموں کے درمیان ہوگا جس کیلئے جہاں دونوں ملکوں کے شائقین کرکٹ انتہائی پرجوش ہیں وہیں دلچسپ ٹاکرے سے لطف اندوز ہونے کیلئے دبئی میں مقیم ارب پتی بھارتی تاجر انیس ساجن نے اپنے ملازمین میں چیمپئنز ٹرافی کے سیکڑوں ٹکٹس مفت میں تقسیم کردیے۔
میڈیا رپورٹس کے مطابق انیس تاجر کے خوش قسمت ملازمین دبئی انٹرنیشنل کرکٹ اسٹیڈیم میں ہونے والے بھارت کے تمام میچز فری میں دیکھ سکیں گے جس میں پاکستان کے خلاف ایونٹ کا سب سے اہم میچ بھی شامل ہے۔
ایونٹ کے 4 اہم میچز کے لیے ملازمین کو فری ٹکٹس (ہر میچ کیلئے60 ٹکٹیں )تقسیم کی گئی ہیں، ایونٹ کے اہم میچز ( 20 فروری ، بنگلا دیش بمقابلہ بھارت، 23 فروری ، بھارت بمقابلہ پاکستان، 2 مارچ ، بھارت بمقابلہ نیوزی لینڈ، اور 4 مارچ سیمی فائنل) کیلئے ملازمین میں فری ٹکٹس بذریعہ قرعہ اندازی تقسیم کیے گئے ہیں۔واضح رہے کہ متحدہ عرب امارات میں 3.7 ملین سے زیادہ بھارتی اور تقریباً 1.7 ملین پاکستانی شہری مقیم ہیں۔
مزید پڑھیں: رمضان پیکیج سے متعلق وزارت آئی ٹی کو احکامات جاری
