اسلام آباد(نیوزڈیسک) معروف اداکارہ عائشہ عمر کا کہنا ہے کہ پاکستان خواتین کیلئے محفوظ نہیں رہا، یوٹیوب پوڈکاسٹ میں اداکارہ نے پاکستان میں خواتین کو پیش آنیوالے مسائل سے متعلق گفتگو کی ساتھ ہی انہوں نے اپنی مشکلات کے بارے میں بھی بتایا۔عائشہ عمر نے کہا میرا سب سے بڑا مسئلہ اس ملک میں یہ ہے کہ میں یہاں خود کو محفوظ نہیں سمجھتی، چاہتی ہوں سڑک پر چل سکوں چہل قدمی کرسکوں، یہ ہر کسی کی بنیادی ضرورت ہے کہ کھلی ہوا میں واک کی جائے۔اداکارہ نے کہا ‘یہ انتہائی افسوسناک بات ہے، مجھے گاڑی میں نہیں بیٹھنا سائیکل چلانی ہے سڑک پر میں کیوں نہیں چلا سکتی؟ یہاں تک کہ پوش علاقوں میں بھی خواتین ایسے نہیں نکل سکتیں، صرف کووڈ 19 کا وقت تھا جب ہم سڑک پر چہل قدمی کیا کرتے تھے اور سائیکل چلاتے تھے۔انہوں نے کہا یہاں پاکستان میں خواتین لڑکوں کی وجہ سے پارک نہیں جاسکتیں، کچھ لڑکے آوازیں کسنا شروع ہوجاتے ہیں۔عائشہ عمر نے مزید کہالاہور میرے مطابق کراچی سے زیادہ محفوظ ہے، ہم آرام سے بسوں میں سفر کرسکتے تھے، میرے ساتھ کراچی میں دو بار ڈکیتیاں ہوئیں، مجھے لوٹا گیا، میں یہ سوچتی ہوں کہ کب وہ دن آئے گا جب میں اپنے ملک میں بغیر کسی ڈر کے پھر سکوں گی، اغوا، ریپ، اور چوروں کا کوئی خوف نہیں ہوگا۔اداکارہ کے مطابق ان کی والدہ 30 سال کی عُمر میں بیوہ ہوگئی تھیں اور پھر ان کی والدہ نے اکیلے ان کی اور بھائی کی پرورش کی تو اس دوران اُنہوں نے پاکستان میں بہت سی مشکلات کا بھی سامنا کیا اس لیے والدہ کبھی نہیں چاہتی تھیں کہ وہ اور ان کا بھائی پاکستان میں رہیں اور یہاں کام کریں۔اُنہوں نے بتایا کہ میرے بھائی ہمیشہ کے لیے ڈنمارک منتقل ہوگئے ہیں جس کے بعد اب میں اور میری والدہ بھی پاکستان چھوڑنا چاہتے ہیں کیونکہ سیاسی رہنماؤں نے پاکستان کے حالات بدتر کردیئے ہیں۔ وہ پاکستان چھوڑنے کا ارادہ کررہی ہیں کیونکہ انہیں یہ ملک خواتین کیلئے محفوظ نہیں لگتا۔
