ممبئی(نیوزڈیسک)بالی ووڈ اداکار ارباز خان کا خیال ہے کہ شاہ رخ خان چھوٹے پردے پر زیادہ متاثر کن میزبان نہیں بن سکتے۔بھارتی ٹی وی کے مطابق ارباز خان نے حال ہی میں اپنے نئے ٹاک شو’’دی انوینسیبلز‘‘ کا آغاز کیا ، اُنہوں نے اپنے ایک انٹر ویو میں بالی ووڈ کے نامور اداکاروں جیسے کہ امیتابھ بچن، سلمان خان، اور شاہ رخ خان کی چھوٹے پردے پر میزبانی کے فرائض سرانجام دینے کی صلاحیت کے بارے میں بھی بات کی۔اُنہوں نے کہا کہ سلمان خان نے ماضی میں اپنے شو’’دس کا دم‘‘ اور مسٹر امیتابھ بچن نے ’’کون بنے گا کروڑ پتی‘‘ کے ساتھ چھوٹے پردے شاندار انداز میں واپسی کی، یہاں تک کہ ان کے فلمی کیریئر بھی ان ٹیلی ویژن ریئلٹی شوز کی وجہ سے کامیابیوں کی نئی بلندیوں پر پہنچ گئے۔اُنہوں نے مزید کہا کہ لیکن شاہ رخ خان چھوٹے پردے پر زیادہ کامیابی حاصل نہیں کرسکے۔ارباز خان نے کہا کہ مجھے لگتا ہے کہ وہ چھوٹے پردے پر خوبصورتی اور فطرت پسندی نہیں لا سکے، جس کی وجہ سے لوگ ان کی میزبانی کے انداز سے زیادہ متاثر نہیں ہوئے۔
