ممبئی(اے بی این نیوز) بھارتی فلم انڈسٹری کی نامور اور سینئر اداکارہ سندھیا شانتارام طویل زندگی گزارنے کے بعد 94 برس کی عمر میں انتقال کر گئیں۔
وہ مشہور فلم ساز وی شانتارام کی اہلیہ تھیں اور اپنی شاندار اداکاری اور رقص کی مہارت کی وجہ سے ہندوستانی سنیما میں ایک منفرد شناخت رکھتی تھیں۔
بھارتی میڈیا کے مطابق سندھیا شانتارام نے ہندی اور مراٹھی فلم انڈسٹری میں ناقابل فراموش کردار ادا کیے جس کے لیے انہیں کئی ایوارڈز سے بھی نوازا گیا۔ وہ اپنے وقت کے ان چند فنکاروں میں سے ایک تھیں جنہوں نے کلاسک، رومانوی اور سماجی موضوعات پر مبنی فلموں میں یکساں مہارت کے ساتھ کام کیا۔
مہاراشٹر کے وزیر برائے انفارمیشن ٹکنالوجی اور ثقافتی امور آشیش شیلر نے انسٹاگرام پر اپنے پیغام میں سندھیا شانتارام کو خراج عقیدت پیش کرتے ہوئے کہا کہ فلم پنجرا کی مشہور اداکارہ سندھیا شانتارام جی کے انتقال کی خبر بہت افسوسناک ہے۔
اس نے اپنی بے مثال اداکاری اور رقص کی مہارت سے ہندی اور مراٹھی فلم انڈسٹری میں ایک الگ پہچان بنائی۔
سندھیا شانتارام کی مشہور فلموں میں جھنک جھنک پائل باجے، دو آنکھیں بارہ ہاتھ اور خاص طور پر پنجرا شامل ہیں، جن میں ان کی اداکاری نے ناظرین کے دلوں پر گہرے نقوش چھوڑے۔
فلمی دنیا کے کئی فنکاروں نے ان کی موت پر اپنے دکھ کا اظہار کرتے ہوئے کہا کہ سندھیا شانتارام کا شمار ان فنکاروں میں ہوتا ہے جنہوں نے ہندوستانی سنیما کی بنیادیں مضبوط کیں۔
مزید پڑھیں:لاہور میں ساڑھے 4 کروڑ روپے چوری کرنے والے ملزمان گرفتار
