بالی وڈ سپر اسٹار سلمان خان کی رواں سال عید پر ریلیز ہونے والی فلم ’سکندر‘ باکس آفس پر کوئی خاص کمال نہ کر سکی اور اداکار کے 37 سالہ کیرئیر کا بدترین ریکارڈ قائم کر لیا۔
فلم ’سکندر‘ نے تین دنوں میں تقریباً 75 کروڑ بھارتی روپے کا بزنس کیا، جو سلمان خان کے سابقہ ریکارڈز سے بہت کم ہے۔ رپورٹس کے مطابق، فلم نے پہلے دن 26 کروڑ، دوسرے دن 29 کروڑ، اور تیسرے دن 19 کروڑ 50 لاکھ بھارتی روپے کمائے، جو کہ مجموعی طور پر 74 کروڑ روپے بنتا ہے۔
تیسرے دن کے دوران فلم کی کمائی میں 32 فیصد سے زائد کمی دیکھی گئی، جس کے باعث کئی سنیما گھروں سے فلم کو ہٹایا جا رہا ہے۔ بھارت کے مختلف شہروں میں سنیما مالکان نے فلم ’سکندر‘ کے ٹکٹس کی فروخت نہ ہونے پر مقامی ملیالم انڈسٹری کی فلم ’ایل 2: امپوران‘ کے شوز کا اضافہ کیا، جو کہ 27 مارچ کو ریلیز ہوئی تھی اور اب تک 250 کروڑ بھارتی روپے سے زائد کا بزنس کر چکی ہے۔
دوسری جانب، فلم کے پروڈیوسر ساجد ناڈیاڈوالا کی جانب سے جاری کردہ اعداد و شمار میں دعویٰ کیا گیا ہے کہ ’سکندر‘ نے تین دنوں میں بھارت سے 102 کروڑ بھارتی روپے اور دنیا بھر میں 39 کروڑ بھارتی روپے یعنی مجموعی طور پر 141 کروڑ بھارتی روپے کا بزنس کیا ہے۔ تاہم، ان اعداد و شمار کی آزاد ٹریڈ ماہرین سے تصدیق نہیں ہو سکی۔
