عید الفطر کے موقع پر پاکستانی فلم سازوں نے جہاں نئی فلمیں ریلیز کی ہیں، وہیں شائقین کے لیے پرانی مقبول فلموں کو دوبارہ سینماؤں میں پیش کیا گیا۔ اس بار عید پر ماضی کی مشہور فلموں جیسے جوانی پھر نہیں آنی، ٹچ بٹن، پنجاب نہیں جاؤں گی، جوانی پھر نہیں آنی ٹو اور تیری میری کہانیاں کو دوبارہ سینماؤں میں ریلیز کیا گیا۔
اس کے ساتھ ہی ملک بھر میں پنجابی بھارتی فلموں اور جنوبی بھارتی فلموں کو بھی سینماؤں میں پیش کیا گیا۔ اس بار انڈونیشین، جرمن اور ہولی وڈ فلمیں بھی عید کے موقع پر سینماؤں میں ریلیز کی گئی ہیں۔ عید کے موقع پر ریلیز ہونے والی نئی فلموں میں قلفی، لمبی جدائی، کبیر اور عشق لاہور شامل ہیں۔
پاکستانی نژاد امریکی اداکار شاز خان کی انگریزی فلم مارشل آرٹسٹ بھی عید کے موقع پر ریلیز کی گئی ہے۔
نئی فلمیں:
- قلفی: بابر علی، شہروز سبزواری، جاوید شیخ، معمر رانا اور سعیدہ امتیاز کی کاسٹ پر مبنی فلم قلفی عید کی سب سے بڑی فلم سمجھی جا رہی ہے۔
- کبیر: پروڈیوسر میسم علی اور ہدایت کار نیہا لاج کی اس فلم میں عدنان شاہ ٹیپو، انعم تنویر، سخاوت ناز، میسم علی اور جہانگیر خان جانی شامل ہیں۔
- عشق لاہور: جاوید شیخ اور صائمہ نور کی کاسٹ پر مبنی پنجابی ایکشن فلم عشق لاہور بھی عید کے موقع پر ریلیز کی گئی ہے۔
- لمبی جدائی: بابر علی، حریم فاطمہ، طیب خان اور فضا مرزا سمیت دیگر کاسٹ پر مبنی لمبی جدائی بھی ریلیز کی گئی ہے۔
- مارشل آرٹسٹ: پاکستانی نژاد امریکی فلم ساز شاز خان کی انگریزی زبان میں بنائی گئی فلم مارشل آرٹسٹ کو پاکستان میں ریلیز کیا گیا ہے، جس کی کہانی پاکستانی سماج پر مبنی ہے۔
پرانی فلمیں:
- جوانی پھر نہیں آنی: مصالحہ کامیڈی جوانی پھر نہیں آنی کو 2015 میں پہلی بار ریلیز کیا گیا تھا اور اب 10 سال بعد دوبارہ سینماؤں میں پیش کیا گیا ہے۔
- ٹچ بٹن: فرحان سعید، فیروز خان اور سونیا حسین کی ٹچ بٹن کو 2023 میں ریلیز کیا گیا تھا، اور اب اسے دو سال بعد دوبارہ سینماؤں میں پیش کیا جا رہا ہے۔
- تیری میری کہانیاں: اس فلم کو بھی 2023 میں ریلیز کیا گیا تھا اور اب دوبارہ سینماؤں میں پیش کیا جا رہا ہے۔
- جوانی پھر نہیں آنی ٹو: یہ فلم 2018 میں ریلیز کی گئی تھی اور اب 7 سال بعد دوبارہ سینماؤں میں پیش کی جا رہی ہے۔
- پنجاب نہیں جاؤں گی: 2017 کی مشہور فلم پنجاب نہیں جاؤں گی کو 8 سال بعد عید کے موقع پر دوبارہ سینماؤں میں پیش کیا گیا ہے۔
اس طرح عید الفطر کے موقع پر پاکستانی سینما میں پرانی اور نئی فلموں کی بھرپور نمائش کی گئی ہے، جو شائقین کے لیے خوشی کا باعث بنی۔
