اسلام آباد ( اے بی این نیوز )پاکستان کی سینئر اداکارہ نادیہ جمیل نے اپنے ایک دلچسپ واقعہ کا ذکر کیا جس میں انہوں نے بتایا کہ کس طرح عمران خان ان کے لیے تھانے گئے تھے۔
نادیہ جمیل نے انکشاف کیا کہ شادی سے قبل وہ اپنے منگیتر (جو اب ان کے شوہر ہیں) کے ساتھ پولیس کے ہاتھوں گرفتار ہو گئی تھیں، اور انہیں چھڑوانے کے لیے عمران خان بھی تھانے پہنچے تھے۔ یہ واقعہ ضیاء الحق کے دور میں پیش آیا، جب شاہین پولیس نکاح کے بغیر ساتھ گھومنے والوں کو پکڑ لیتی تھی۔
نادیہ نے بتایا کہ وہ اپنے منگیتر کے ساتھ گاڑی میں سیر کے لیے نکلیں تو شاہین پولیس نے انہیں روک لیا اور بعد میں تھانے لے جاکر حوالات میں بند کر دیا، کیونکہ وہ اپنا نکاح نامہ نہیں پیش کر سکے تھے۔ نادیہ نے پولیس سے درخواست کی اور جرمانہ ادا کرنے کی پیشکش بھی کی، مگر پولیس نے انہیں رہا نہیں کیا۔
اداکارہ نے کہا کہ تھانے پہنچنے کے بعد انہیں ایک کال کرنے کی اجازت ملی۔ انہوں نے فوراً اپنے والد کے دوست یوسف صلاح الدین کو فون کیا، جو اس وقت عمران خان اور دیگر دوستوں کے ساتھ موجود تھے۔ عمران خان نادیہ جمیل کے والد کے قریبی دوست تھے۔ یوسف صلاح الدین نے فوراً عمران خان کو واقعے سے آگاہ کیا، اور وہ فوراً تھانے پہنچ گئے۔
نادیہ جمیل نے بتایا کہ جب پولیس اہلکاروں نے عمران خان کو دیکھا تو وہ حیران رہ گئے اور فوراً چائے منگوا لی۔ عمران خان اور ان کے دوستوں کی مدد سے نادیہ اور ان کے منگیتر کو رہا کر لیا گیا۔
نادیہ جمیل نے مزید بتایا کہ اس واقعے کے کئی سال بعد جب وہ عمران خان سے ایک ٹی وی انٹرویو کے لیے ملیں، تو عمران خان نے مزاحیہ انداز میں کہا، “جس شخص کے ساتھ پولیس کے ہاتھوں گرفتار ہوئی تھی، اسی سے شادی بھی کر لی۔”
