کراچی (نیوزڈیسک)معروف اداکارہ صنم سعید نے کہا ہے کہ بولی وڈ فلموں میں ہمیشہ مسلمانوں اور پاکستانیوں کو بھارت کے دشمن کے طور پر منفی کرداروں میں دکھایا جاتا ہے جو کہ انتہائی غلط بات ہے۔صنم سعید نے بھارتی ویب سائٹ کو دیے گئے انٹرویو میں بولی وڈ فلموں کے مواد اور دونوں ممالک میں فنکاروں پر پابندی کے حوالے سے بات کی۔انہوں نے بتایا کہ انہوں نے شاید ہی کوئی ایسی بولی وڈ فلم دیکھی ہو، جس میں مسلمانوں اور پاکستانیوں کو مثبت کردار یا بھارت کے دوست کے کردار میں دکھایا گیا ہو۔اداکارہ کے مطابق بولی وڈ فلموں میں ایک مسلمان شخص کو نماز کی ٹوپی اور آنکھوں میں کاجل لگایا ہوا دکھایا جاتا ہے جب کہ اسے ایسی جگہ پر نماز پڑھتے ہوئے دکھایا جاتا ہے، جس کے پیچھے سبز رنگ کے کپڑے لٹکے ہوتے ہیں۔صنم سعید کا کہنا تھاکہ بولی وڈ فلم سازوں کے لیے آنکھوں میں کاجل لگانے، نماز کی ٹوپی پہننے اور نماز کی جگہ ہرے کپڑے لٹکانے والے ہی مسلمان ہوتے ہیں۔انہوں نے اس بات پر اظہار افسوس کیا کہ بھارتی فلموں میں مسلمانوں اور پاکستانیوں کو بھارت کے دشمن کے روپ میں منفی کرداروں میں دکھایا جاتا ہے۔ایک سوال کے جواب میں انہوں نے اعتراف کیا کہ انہوں نے متعدد بولی وڈ فلمیں دیکھی ہیں اور کسی ایک اپنی پسندیدہ فلم کا نام بتانا ان کے لیے بہت مشکل ہوگا۔
