اسلام آباد(نیوزڈیسک)عوام کو ایک بار پھر ہزار وولٹ کا جھٹکادینے کی تیاریاں، بجلی کی قیمت میں ایک بار پھر اضافہ متوقع، مہنگی بجلی کے باعث عوام 36 ارب روپے کا اضافی بوجھ برداشت کرنے کیلئے تیار رہے ۔سینٹرل پاور پرچیزنگ ایجنسی نے بجلی قیمت میں 4 روپے 66 پیسے فی یونٹ اضافے کیلئے درخواست حکومتی ایجنسی نیپرا میں جمع کروادی، جس پر نیپرا کی سماعت کل ہوگی۔بجلی کی قیمت میں 4.66 روپے فی یونٹ کا اضافہ ماہ نومبر کے فیول پرائس ایڈجسٹمنٹ اور بقایا جات کی مد میں مانگا گیا، جس کی منظوری کی صورت میں بجلی صارفین پر 36ارب روپے سے زائد کا اضافی بوجھ پڑے گا۔سی پی پی اے کی جانب سے قیمت میں اضافے کے لیے دی گئی درخواست میں کہا گیا ہے کہ ماہ نومبر کے دوران پانی سے بجلی کی پیداوار 36.5 فیصد رہی۔ نیوکلیئر سے بجلی سے کی پیداوار 20 فیصد سے زائد رہی۔ ایک ماہ کے دوران مقامی کوئلے سے بجلی کی پیداوار 13 فیصد رہی۔ نومبر میں درآمدی کوئلے سے بجلی کی پیداوار 6 فیصد سے زائد رہی۔ ایک ماہ کے دوران ایل این جی کے زریعے بجلی کی پیداوار 10.6 فیصد رہی جب کہ مقامی گیس سے بجلی کی پیداوار کا حصہ 9.2 فیصد رہا۔