لاہور(نیوزڈیسک) سوئی ناردرن کمپنی نے پاکستانی شہریوں پر اربوں روپے کا ایک اور ٹیکس لگادیا۔گیس بلوں میں ماہانہ فکسڈ چارجز نومبر کے بلز میں شامل،کمپنیوں نے اپنے لاسز پورے کرنے کیلئے اوگرا کے ساتھ مل کرراستہ تلاش کرلیا اور صارفین پر اربوں روپے کا ماہانہ فکسڈ چارجز کے نام پر لوٹ مار کا پلان تیار کرلیا۔ذرائع کا کہنا ہے کہ اوگرا نے خاموشی سے فکسڈ چارجز وصولی کی اجازت دے دی ہے۔ حکام کے مطابق پروٹیکٹڈ صارفین 0.9 ہیکٹا میٹر گیس استعمال والے ماہانہ 400 روپے فکسڈ چارجز دیں گے ۔ نان پروٹیکٹڈ 1.5 ہیکٹا میٹرتک گیس استعمال والے 1000 روپے ماہانہ اضافی بل دیں گے۔ اس سے زائد استعمال والے صارفین ماہانہ 2 ہزار روپے اضافی فکسڈ رقم ادا کریں گے ۔سوئی گیس حکام کے مطابق جس صارف کا استعمال صفر ہو گا وہ بھی 400 روپے ادا کرنے کا پابند ہو گا ۔ یہ ماہانہ فکسڈ چارجز حکومت کی منظوری سے شامل کیے گئے ہیں۔ ذرائع کا کہنا ہے کہ ماہانہ فکسڈ اضافی چارجز کو صارفین صرف ہائی کورٹ میں چیلنج کر سکتے ہیں۔ ماہانہ فکسڈ ٹیکس گیس کمپنی کے 80 لاکھ کنزیومر پر لاگو ہو گا ۔ ایک اندازے کے مطابق سالانہ 60 سے 70 ارب روپے بنتے ہیں ۔