کراچی(نیوزڈیسک) ملک میں گیس بحران شدت اختیار کرگیا ، حکومتی لاپرواہی سے گیس کی قلت سے پریشان صنعت کاروں نے احتجاجاً تمام صنعتیں بند کردی ہیں۔گیس بحران کے باعث صنعتی پیداوار نہ ہونے کے برابر رہ گئی، کراچی گیس بحران سے سب سے زیادہ متاثر ،کراچی میں قائم ساتوں انڈسٹریل زونزکو آج احتجاجا بند کردیا گیا۔نائب چیئرمین بزنس مین گروپ کے جاوید بلوانی نے کہا کہ گیس کی عدم فراہمی سے صنعتی پیداوار بند ہوگئی، مزدوروں کو فیکٹری آنے سے منع کردیا گیا ہے۔واضح رہے کہ گزشتہ دنوں پاکستان کے کاروباری حب کراچی کے صنعتکاروں نے پیداوار مکمل طور بند کرنے کا اعلان کیا تھا تاکہ نگراں حکومت کو گیس کے نرخوں میں غیر معمولی اضافے کو واپس لینے پر مجبور کیا جاسکے۔کاروباری افراد نے پہلے ہی تمام ٹریڈ ایسوسی ایشن کے باہر احتجاجی بینرز آویزاں کر رکھے ہیں جس میں حکومت سے مطالبہ کیا گیا کہ گیس کے نرخ 2100 تا 2600 روپے فی ایم ایم بی ٹی یو کے بجائے آئل اینڈ گیس ریگولیٹری اتھارٹی (اوگر) کی جانب سے منظور کردہ ایک ہزار 350 روپے فی ایم ایم بی ٹی یو پر لائے جائیں۔
